დღეს, 16 ივნისს, 10:00 საათზე, სასტუმრო ,,რუმს თბილისში“ გაიმართება კონფერენცია„თვითმმართველობის ორგანოების საქმიანობა და დეცენტრალიზაციის პროცესი - სამოქალაქო ორგანიზაციების შეფასებები.“ კონფერენცია არასამთავრობო ორგანიზაციების ,,სიდას“ და სამართლიანი არჩევნებისა და დემოკრატიის საერთაშორისო საზოგადოების (ISFED) ორგანიზებით იმართება და მას ადგილობრივი ხელისუფლების, არასამთავრობო და საერთაშორისო ორგანიზაციების წარმომადგენლები დაესწრებიან.
ორგანიზატორების ინფორმაციით, შეხვედრაზე სამოქალაქო ორგანიზაციები წარმოადგენენ ანგარიშს, რომლის მიზანია თავი მოუყაროს სამოქალაქო სექტორის მიერ უკანასკნელი პერიოდის მანძილზე თვითმმართველობის რეფორმისა და საქმიანობის შესახებ შეფასებებს და ამის საფუძველზე წარმოადგინოს გარკვეული ხედვა, რაც გამოვლენილი პრობლემების მოსაგვარებლად შეიძლება იყოს ეფექტიანი.
2014 წლის რეფორმის შედეგად მიღწეული იქნა ისეთი მნიშვნელოვანი სიახლეები, როგორიცაა მერებისა და გამგებლების პირდაპირი წესით არჩევა, 7 ახალი მუნიციპალიტეტის შექმნის გზით ქალაქისა და სოფლის როლის გაძლიერება ამ თვითმმართველ ერთეულებში. პოლიტიკური პროცესების შედეგად საგრძნობლად გაიზარდა გამჭვირვალობის ხარისხი და მუნიციპალიტეტის ორგანოები უფრო მეტ მზაობას გამოხატავენ სამოქალაქო ჩართულობისა და საზოგადოებასთან თანამშრომლობისათვის.
ანგარიშის მიხედვით ირკვევა, რომ აღნიშნული მიღწევების მიუხედევად, პრობლემურად რჩება ინფორმაციის თავისუფლების ცალკეული ასპექტები, გამოწვევაა ინფორმაციის პროაქტიული გამოქვეყნება, მუნიციპალიტეტების ფინანსური დამოუკიდებლობა და მოქალაქეთა რეალური ჩართულობა გადაწყვეტილებათა მიღებაში, ეფექტიანი და კორუფციისაგან თავისუფალი სახელმწიფო შესყიდვები და, ასევე, ნეპოტიზმის ფაქტები, განსაკუთრებით კადრების შერჩევისას.
სამოქალაქო ორგანიზაციების რეკომენდაციით, აუცილებელია თვითმმართველობის რეფორმის ფარგლებში დროულად განხორციელდეს ტერიტორიული ოპტიმიზაცია, მუნიციპალიტეტები გააქტიურდნენ საკუთარი ფინანსების მოზიდვაში, გადამზადდეს კადრები, რომ თანამშრომლებს ჰქონდეთ სათანადო ცოდნა და უნარ-ჩვევები ინფორმაციის საჯაროობის, ბიუჯეტის დროულად და სათანადოდ დაგეგმვის და სხვა საკითხების შესახებ, რაც მნიშვნელოვანია თვითმმართველობის ეფექტური ფუნქციონირებისათვის. ასევე, კვალიფიციური კადრების მოსაზიდად აუცილებელია გამჭვირვალე კონკურსების ჩატარება, რაც დაფუძნებული იქნება ობიექტური შეფასების სისტემაზე.
ანგარიში მომზადებულია სამოქალაქო განვითარების სააგენტოსა (სიდა) და სამართლიანი არჩევნებისა და დემოკრატიის საერთაშორისო საზოგადოების მიერ, სამოქალაქო საზოგადოების რეგიონულ ქსელსა(R-CSN) და ეროვნულ სამოქალაქო ორგანიზაციებთან თანამშრომლობით.
ანგარიშის მომზადება შესაძლებელი გახდა ფონდის „ღია საზოგადოება - საქართველო“, „აღმოსავლეთ-დასავლეთის მართვის ინსტიტუტის“ ACCESS პროგრამის, რომელსაც USAID აფინანსებს და „ეროვნული წვლილი დემოკრატიისათვის“ (NED) მხარდაჭერით.
კონფერენცია თანაორგანიზებულია სამოქალაქო საზოგადოების რეგიონული ქსელისა (R-CSN) და საქართველოს ადგილობრივ თვითმმართველობათა ეროვნული ასოციაციის მიერ.
