30 მაისს საქართველოს ტექნიკური უნივერსიტეტის პირველი კორპუსის ზედა კომპიუტერულ დარბაზში ჩატარდა 2016 წლის პირადი პირველობა დაპროგრამებაში. 2013 წლიდან სტუ-ს პირველობები იმართება ყოველწლიურად, სტუდენტებისთვის სტანდარტული, ე.წ. ACM-ის სისტემით. ამ სისტემის არსი მდგომარეობს იმაში, რომ მონაწილეს ამოცანა ეთვლება შესრულებულად მხოლოდ იმ შემთხვევაში, თუ იგი წარმატებულად გადის ყველა ტესტს. „ამჯერად მონაწილეებს შევთავაზეთ 11- ამოცანიანი პაკეტი. ამოცანებში იყო წარმოდგენილი საოლიმპიადო დაპროგრამებისთვის დამახასიათებელი რამდენიმე პრობლემატიკა“, - განაცხადა სტუ-ს 2016 წლის პირადი პირველობის დირექტორმა თემურ ზარქუამ. როგორც ზარქუამ აღნიშნა, წელს მონაწილეთა შორის არ აღმოჩნდა სტუ-ს მთელი რიგი გამოცდილი ოლიმპიელი, მათ შორის, გასული წლების გამარჯვებულები. ამას, როგორც ჩანს, თავისი სავსებით ობიექტური მიზეზი აქვს. ის პლეადა, რომელმაც გამოიჩინა თავი წინა ოლიმპიადებზე, უკვე დასაქმებულია სერიოზულ ორგანიზაციებში და უჭირს დროის გამოყოფა ოლიმპიადებისთვის კარგად მომზადებისთვის. ხოლო მხოლოდ ადრინდელი მარაგის ხარჯზე დღეს უკვე ძნელია შედეგის მიღწევა. წლევანდელი ოლიმპიადის მონაწილეთა აბსოლუტური უმრავლესობისთვის ეს იყო მათი დებიუტი არა მარტო სტუ-ს პირველობაზე, არამედ, საერთოდაც, დაპროგრამების ოლიმპიადებზე. „ასეთ პირობებში, ძალიან საგულისხმოა მონაწილეთა მონდომება. პირადად ჩემთვის უაღრესად სასიამოვნო იყო ის ფაქტი, რომ შეჯიბრების მთელი 4-საათიანი პერიოდის განმავლობაში მონაწილეები ბოლომდე ეცადნენ შესჭიდებოდნენ ამოცანათა საკმაოდ რთულ პაკეტს. ეს გვაძლევს მათგან სამომავლოდ კარგი შედეგების მოლოდინის იმედს. არანაკლებ სასიამოვნო იყო უკლებლივ ყველა მონაწილისგან ”სამართლიანი თამაშის” წესებისადმი მიდრეკილების გამოვლენა“, - განაცხადა ზარქუამ. საბოლოოდ, სტუ-ს 2016 წლის ჩემპიონი გახდა ინფორმატიკისა და მართვის სისტემების ფაკულტეტის მეოთხე კურსის სტუდენტი, დაჩი მაძღარაშვილი, რომელმაც 38-ე წუთზე გახსნა შესრულებულ ამოცანათა ანგარიში და ამ მომენტიდან შეჯიბრების ბოლომდე არ გაუშვია ხელიდან ლიდერობა. მან თავიდან ამოხსნილ ერთ ამოცანას პირველი ცდიდან ამოხსნილი ერთი ამოცანაც დაუმატა (კიდევ 2 ამოცანაზე იმუშავა, საიდანაც ერთის ამოხსნასთან საკმაოდ ახლოს იყო), რაც სავსებით საკმარისი აღმოჩნდა გამარჯვებისთვის. ამ გამოსვლით დაჩი მაძღარაშვილმა საუკეთესოდ დაადასტურა წელს სტუ-ს ნაკრებში ილია ვეკუას თასზე საერთაშორისო ოლიმპიადაში მონაწილეობისთვის მისი შეყვანის მართებულობა. „მკითხველს შევახსენებ, რომ 2013 წლის სტუ-ს პირველობაში გაიმარჯვა გიორგი დარჩიაშვილმა, ხოლო მომდევნო ორ ჩემპიონატში გამარჯვება მოიპოვა მისმა ძმამ, ნოდარ დარჩიაშვილმა“, - განაცხადა ზარქუამ. თემურ ზარქუას განცხადებით, კიდევ 4-მა მონაწილემ თითო ამოცანა ჩააბარა. მათ შორის გამოყოფას იმსახურებს მეორეკურსელი რავილ გასანოვი, რომელიც ჩაბარებული ამოცანის გარდა კიდევ 2 ამოცანას შეერბრძოლა და საკმაოდ ახლოს იყო ქულების მარაგის გაზრდასთან. „პირველკურსელებისთვის, ოლღა არველაძისა და გიორგი ჯანჯულიასთვის, ვფიქრობ, 1 ამოცანის ამოხსნა საკმაოდ კარგი შედეგია დებიუტის კვალობაზე. ცოტა მეტს ველოდით ოლიმპიადებში მონაწილეობის გამოცდილების მქონე გიორგი თუთბერიძისგან (მესამე კურსი), რომელმაც ასევე 1 ამოცანა ჩააბარა“, - განაცხადა მან. „ცალკე მინდა აღვნიშნო შეჯიბრების ორგანიზების იდეალურთან ახლო დონე, რაც უკვე სასიამოვნო ტრადიცია ხდება სტუ-ს პირველობებისთვის. შეჯიბრების დროს არ ჰქონია ადგილი არც ერთ ტექნიკურ ან საორგანიზაციო ხასიათის შეფერხებას. შეცდომებისგან თავისუფალი აღმოჩნდა აგრეთვე შემოთავაზებული ამოცანების პაკეტი. პროგრამირებაში სტუ-ს ნაკრების წევრებს მიმდინარე წლის ოქტომბრის ბოლოს ელოდება უმაღლეს სასწავლებელთა შორის მსოფლიო ჩემპიონატის მეოთხედფინალი, ხოლო დეკემბრის დასაწყისში კი ნახევარფინალი და სამხრეთ კავკასიის ღია პირველობა. მზადება ამ ოლიმპიადებისთვის უკვე დაწყებულია. აგვისტოში იგეგმება 10-დღიანი საწვრთნელო ბანაკის ორგანიზება. მანამადე კი, ივლისის დასაწყისში, კიევის ეროვნული ტექნიკური უნივერსიტეტი ატარებს გამოჩენილი მეცნიერების, გლუშკოვისა და ლებედევის ხსოვნისადმი მიძღვნილ დაპროგრამების მე-12 ოლიმპიადას. უკრაინელმა კოლეგებმა უკვე გვაცნობეს, რომ მოხარული იქნებიან მონაწილეთა შორის სტუ-ს გუნდი იხილონ. იმის გათვალისწინებით, რომ 2011 წლის მერე ამ ოლიმპიადაში ქართველ სტუდენტებს არ მიუღიათ მონაწილეობა, მანამდე კი არაერთხელ დაგვიკავებია საპრიზო ადგილები, ჩვენი გუნდის მონაწილეობა აღნიშნულ ოლიმპიადაში ერთობ სასურველად გამოიყურება. მით უფრო, რომ სტუ-ს ძალიან მჭიდრო ურთიერთობა აქვს კიევის ეროვნულ ტექნიკურ უნივერსიტეტთან. ამ საკითხის პოზიტიურად გადაწყვეტის შემთხვევაში ნაკრების ერთი კანდიდატი უკვე გამოვლენილად შეიძლება ჩავთვალოთ, ხოლო დანარჩენი ორის გამოსავლენად დამატებითი შერჩევა იქნება ჩასატარებელი“, - აღნიშნა ზარქუამ. თემურ ზარქუას განცხადებით, ჩატარებულმა ღონისძიებამ დაგვანახა, რომ ჯერჯერობით სტუდენტთა საზოგადოებაში არ არის ჩამოყალიბებული სწორი შეხედულება დაპროგრამების ოლიმპიადების მნიშვნელობის თაობაზე. სხვა ვერაფრით ვერ აიხსნება ის პასიურობა, რასაც აქვს ადგილი ამ სახის საქმიანობის მიმართ სტუდენტთა დიდი უმრავლესობისგან. არადა, უკეთესი რა შეიძლება გააკეთოს ამ პროფილის სტუდენტმა თავისი სამომავლო პროფესიული კარიერის უზრუნველსაყოფად. „ახალგაზრდებს კი, რომლებმაც თავი გამოიჩინეს სტუ-ს პირად პირველობაზე, მიულოცოთ ეს წარმატება და სამომავლოდ ბევრი ახალი და დიდი წარმატება ვუსურვოთ“, - განაცხადა მან