„აუდიტორია 115“ განათლების ახალ მინისტრს ალექსანდრე ჯეჯელავას თბილისის სახელმწიფო უნივერსიტეტში მათთან შესახვედრად იწვევს. სტუდენტების გაერთიანებას მინისტრთან შეხვედრა დღეისათვის აქვთ ჩანიშნული. ამის შესახებ „აუდიტორია 115“-ის განცხადებაშია აღნიშნული, რომელსაც ისინი ავრცელებენ.
„განათლებისა და მეცნიერების სამინისტროში განხორციელებული საკადრო ცვლილებების გამო, შეყოვნდა პროცესი, რომელიც ერთის მხრივ ითვალისწინებდა საკანონმდებლო ცვლილებებს უმაღლესი განათლების შესახებ კანონში,(საფაკულტეტო საბჭოებში სტუდენტების პირდაპირი წესით არჩევა, რეგულაციის დაწესება, რომლის თანახმადაც რექტორის მოვალეობის შემსრულებელი ვერ გახდება რექტორი, სტუდენტური თვითმმართველობის ცენტრალიზებული, იერარქიული სტრუქტურის გაუქმება) ხოლო, მეორეს მხრივ, დაგეგმილი იყო განათლებასთან დაკავშირებული საკითხების შესახებ პლატფორმის შექმნა, რომლის განსახილველი საკითხებს შორის პირველი არის განათლების ფუნდამენტური რეფორმა და გარე რეფერირება.
მიგვაჩნია, რომ აღნიშნული შეთანხმების იმპლემენტაცია, რომელსაც მივაღწიეთ საქართველოს პრემიერ-მინისტრთან და განათლების სამინისტროსთან, უნდა დაჩქარდეს, ვინაიდან, პარლამენტის მუშაობის დასრულებამდე სულ უფრო ცოტა დრო რჩება, ამ საკითხების "ღიად" დატოვება კი კიდევ უფრო გაამძაფრებს იმ კრიზისულ სიტუაციას, რომელიც ახლა უნივერსიტეტშია.
აღნიშნულ თემებზე სასაუბროდ და არა მარტო, ორშაბათს, დღის მეორე ნახევარში, 18 საათზე, აუდიტორია 115-ში, ვიწვევთ განათლების ახალ მინისტრს, ალექსანდრე ჯეჯელავას“, - აღნიშნულია განცხადებაში.