ხვალ, ბიძინა ივანიშვილის ჟურნალისტებთან შეხვედრის ახალი ფორმატი დაანონსდება, - ამის შესახებ ინფორმაციას ”ქართუ ჯგუფის” საზოგადოებასთან ურთიერთობის სამსახურის უფროსის გიორგი უძილაური ავრცელებს. მისი თქმით, შეთანხმება ”რუსთავი 2-თან” და ”ტაბულასთან” ვერ შედგა.
”მოკლედ, ივანიშვილის შეთავაზებაზე - შემდგარიყო მისი შეხვედრა ”რუსთავი 2”-თან და ”ტაბულასთან” და საუბარი პირდაპირი ეთერით გადაცემულიყო, ”რუსთავი 2”-ის ხელმძღვანელობამ უარი თქვა. ”ტაბულამ” გამოთქვა მზადყოფნა შეხვედრისთვის ნეიტრალურ ტერიტორიაზე, ფორმატით: მხოლოდ ”ტაბულა” და ივანიშვილი. ამის შემდეგ
”ტაბულას” მიეცა ახალი შეთავაზება, სხვა ტელეარხის ან ტელეარხების წარმომადგენლებთან ერთად მომხდარიყო შეხვედრა ივანიშვილთან. თუმცა ეს შეთავაზებაც უარყოფილ იქნა, რადგან ისინი თანახმა იყვნენ მხოლოდ "მსგავსი სარედაქციო პოლიტიკის" მქონე არხთან ერთად შეხვედროდნენ ყოფილ პრემიერს. ასეთ არხად კი ”ტაბულა” მხოლოდ "რუსთავი 2"-ს მიიჩნევს...
მოკლედ, ორი შეთავაზება უარყოფილია. საზოგადოებისთვის საინტერესო იქნებოდა ამ ორი არხის წარმომადგენელთა და ივანიშილის შეხვედრა - არ უნდათ, ნუ უნდათ. ხვალ დაანონსდება სულ სხვა ფორმატი”, - აცხადებს უძილაური.
ტელეკომპანია ”ტაბულას” დირექტორმა თამარ ჩერგოლეიშვილის განცხადებით, რომ მზადაა შეუქმნას ბიძინა ივანიშვილს ახალი ფორმატი.
,,”რუსთავი 2”-ის გენერალურმა დირექტორმა ბიძინა ივანიშვილის ეგზოტიკურ შეთავაზებაზე უარი თქვა, რჩება ”ტაბულა”. ბუნებრივია, ჩვენ რომ ვიყოთ ნორმალურ ვითარებაში, მსგავსი ეგზოტიკა ჩვენთვისაც მიუღებელი იქნებოდა, მაგრამ ჩვენ არ ვართ ნორმალურ ვითარებაში.
შესაბამისად:
1. ჩვენ მზად ვართ შევუქმნათ ივანიშვილს ახალი ფორმატი - გამომდინარე იქიდან, რომ არსებულ ფორმატებში სათქმელის გამოხატვას შეუძლებლად მიიჩნევს.
2. ჩვენ მზად ვართ შევთავაზოთ "ნეიტრალური ტერიტორია" - რადგან ტაბულას ტერიტორია მისთვის დისკომფორტის შემქმნელია. ქირას გადავიხდით ჩვენ და არა ოლიგარქი.
3. ”რუსთავი 2-ის” პასუხის შემდეგ, ბუნებრივია თანხმლები პირის საჭიროება (რომელსაც თავად მოდერატორს უწოდებენ) მთლიანად გამოირიცხა, მაგრამ თუ მარტო ვერ მოდის, მოიყვანოს და დაისვას გვერდით ვინც უნდა (თუნდაც, კალაძის რომელიმე მოჭიდავე).
4. ჩვენ მზად ვართ მიმოვიხილოთ მისი წერილი.
5. ჩვენ მზად ვართ მოვისმინოთ მისი "რეპლიკები" "სიცრუის ტირაჟირებასთან" დაკავშირებით. მოკლედ, გელით ბ-ნო ბიძინა”, - წერს ჩერგოლეიშვილი ”ფეისბუქის” საკუთარ გვერდზე.
