პრემიერ-მინისტრმა გიორგი კვირიკაშვილმა პოლიციელებს პროფესიული დღე მიულოცა. პოლიციელის დღის აღსანიშნავად გამართულ საზეიმო ღონისძიებაზე მან განაცხადა, რომ პოლიციელის პროფესია ურთულესია.
,,ძალიან დიდია ის პასუხისმგებლობა, რომელსაც პოლიციელის ურთულესი პროფესია გაკისრებთ თითოეულ თქვენგანს. დღეს, ალბათ, ყოველი თქვენგანი კიდევ ერთხელ უფიქრდება საკუთარ პროფესიულ არჩევანს და დარწმუნებული ვარ, ამაყობთ, რომ საქართველოს სამსახურში, ჩვენი ხალხის სამსახურში დგახართ.
თქვენ ხელშია საზოგადოებრივი წესრიგი, თქვენ პროფესიონალიზმზეა დამოკიდებული ჩვენი მოქალაქეების სიმშვიდე და უსაფრთხოება. ჩვენ ვიცით და ვაფასებთ, რომ წესრიგს, სიმშვიდეს, ჩვენს უსაფრთხოებას ხშირად საკუთარი სიცოცხლის რისკის ფასად იცავთ.
დიდი მადლობა მინდა გითხრათ ყველას ერთგულებისთვის, სიმამაცისთვის, ქვეყნის წინაშე თავდადებისთვის“, - განაცხადა პრემიერმა და სამსახურებრივი მოვალეობის შესრულების დროს დაიღუპული პოლიციელები გაიხსენა.
,,ჩვენ გვყავს თანამედროვე სახელმწიფოს შესაფერისი პოლიცია, რომელსაც ენდობა და რომლის იმედიც აქვს საზოგადოებას. ამ მხრივ, მოწინავე პოზიციებზე ვართ რეგიონში და არა მხოლოდ“, - დასძინა გიორგი კვირიკაშვილმა.
