ტელეკომპანია "მაესტროს" გადაცემების - "საქმიანი დილისა" და "ბიზნესკონტაქტის" ავტორი გიორგი ისაკაძე "მაესტროდან" მისი გათავისუფლების საკითხზე სასამართლოს მიმართავს.
ისაკაძემ ამის შესახებ განცხადება, ტელეკომპანიის პირდაპირ ეთერში რამდენიმე წუთის წინ გააკეთა. ისაკაძე ამბობს, რომ სამსახურიდან მისი გაშვება მისთვის სიურპრიზი არ ყოფილა და ასევე დეტალურად საუბრობს არხის ხელმძღვანელობასთან გამართულ შეხვედრებსა და საუბრებზე, რომლებიც პროექტების ფინანსურ მხარეს ეხებოდა
„მაესტროს“ გენერალური დირექტორისგან მიღებული მეილი ჩემთვის არ ყოფილა სიურპრიზი, იმ მარტივი მიზეზის გამო, რომ გუშინ დილით შეხვედრა მქონდა ზურაბ ნაყეურთან, რომელმაც გადმომცა ყველაფერი ის, რაც წერილში იყო აღწერილი. საუბარია იმაზე, რომ მას შემდეგ რაც მან დამატებით გაიარა კონსულტაციები კომპანიის დამფუძნებლებთან, ბორდის წარმომადგენლებთან, საუბარია აქციონერების 80 პროცენტზე, რადგან როგორც თავადაც მითხრა და საყოველთაოდ ცნობილია, ამ ტიპის გადაწყვეტილებებში მონაწილეობას არ იღებენ ძველი დამფუძნებლები, ვგულისხმობ მამუკა ღლონტს, ეკა აკობიას და ილია კიკაბიძეს. მან ზეპირად მითხრა, რომ არ სურთ, გააგრძელონ ჩემთან საქმიანი ურთიერთობა, როგორც პროექტის ხელმძღვანელთან“,-განაცხადა ისაკაძემ.