საქართველოს პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე დიასპორის მეორე ფორუმის - „გაუზიარე გამოცდილება სამშობლოს“ მნიშვნელობაზე ისაუბრა.
როგორც პრემიერმა აღნიშნა, ეს არის ძალიან კარგი ინიციატივა, რომელიც უზრუნველყოფს დიასპორის ჩართულობას ქვეყნის განვითარების საქმეში.
ამასთან, გიორგი კვირიკაშვილის თქმით, სიმბოლურია, რომ გუშინ, ხელი მოწერა საფრანგეთში ლევილის მამულის საქართველოს სახელმწიფოსთვის გადმოცემის თაობაზე განზრახულობათა ოქმს. როგორც პრემიერმა განმარტა, ლევილის მამული იქნება ქართული კულტურის კერა საფრანგეთში, რომლის განვითარებაზეც სახელმწიფო იზრუნებს.
„სიმბოლურია ზუსტად ის, რომ გუშინ მოეწერა ხელი დოკუმენტს, საფრანგეთში ლევილის მამულის საქართველოს სახელმწიფოსთვის გადმოცემის თაობაზე, ეს არის განზრახულობათა ოქმი, რომელიც სავარაუდოდ, დაგვირგვინდება შემოდგომისთვის, უკვე იმ დოკუმენტის სახით, რომ ეს მამული გადმოეცემა საქართველოს სახელმწიფოს.
მოგეხსენებათ, რომ პირველი რესპუბლიკის ხელმძღვანელთა შთამომავლებმა მოაწერეს ხელი და მინდა დიდი მადლობა გადავუხადო პირველ რიგში, სწორედ ჩვენს თანამემამულეებს, რომლებიც ცხოვრობენ საფრანგეთში და რომლებმაც გამოხატეს კეთილი ნება. ასევე, მინდა დიასპორის მინისტრსა და იუსტიციის მინისტრს გადავუხადო დიდი მადლობა ამ ძალიან მნიშვნელოვანი სამუშაოსთვის.
ეს იქნება ქართული კულტურის კერა საფრანგეთში და სახელმწიფო იზრუნებს ამ კულტურის კერის განვითარებისათვის.ვფიქრობ, რომ ეს გახდება ერთ-ერთი მნიშვნელოვანი ცენტრი არამხოლოდ საფრანგეთის მასშტაბით, არამედ მსოფლიო მასშტაბით“, - განაცხადა გიორგი კვირიკაშვილმა.
