შსს-ს საპატრულო პოლიციის დეპარტამენტის ინფორმაციით, 27 მაისს, 15:00 საათიდან, თბილისში, ბორის პაიჭაძის სახელობის ეროვნულ სტადიონზე დაგეგმილ კონცერტთან დაკავშირებით, საზოგადოებრივი წესრიგის დაცვისა და ავტოტრანსპორტის უსაფრთხოდ მოძრაობის მიზნით, ავტომანქანით გადაადგილება იკრძალება შემდეგ ქუჩებზე:
მტკვრის მარცხენა სანაპიროს და ცაბაძის ქუჩის კვეთიდან ცაბაძისა და თევდორე მღვდლის ქუჩების კვეთამდე (ცაბაძის ქუჩა სრულად დაიკეტება);
წერეთლის გამზირის დასაწყისიდან (N1-დან) ვახუშტის ქუჩის კვეთამდე;
გადაიკეტება დავით აღმაშენებლის გამზირი. კერძოდ, თამარ მეფის გამზირისა და დავით აღმაშენებლის გამზირის კვეთიდან - დავით აღმაშენებლის გამზირისა და ცაბაძის ქუჩის კვეთამდე;
ავტომანქანები ვერ იმოძრავებენ დავით ყიფიანისა და მეტრეველის ქუჩებზე;
სატრანსპორტო მოძრაობა იკრძალება თამარ მეფის გამზირისა და მიხეილ წინამძღვრიშვილის ქუჩის კვეთიდან - მიხეილ წინამძღვრიშვილის ქუჩისა და წერეთლის გამზირის კვეთამდე;
მძღოლები ასევე ვერ იმოძრავებენ აბასთუმნის ქუჩაზე.
სრულად დაიკეტება ბორის პაიჭაძის სახელობის ეროვნული სტადიონის - „დინამო არენას“ მიმდებარე ქუჩები.
ავტომანქანებით გადაადგილება ნებადართული იქნება მტკვრის მარცხენა სანაპიროზე, თამარ მეფის გამზირსა და თევდორე მღვდლის ქუჩაზე.
გადაკეტილ ქუჩებზე მოძრაობა აღდგება კონცერტის დასრულების შემდეგ.
რობი უილიამსის კონცერტი თბილისში დღეს გაიმართება. დინამო არენას კარი მსმენელისთვის ხუთ საათზე გაიხსნება.
ბრიტანელი ვარსკვლავის კონცერტისთვის უკვე ყველაფერი მზად არის. დამონტაჟებულია სცენა, განათება და მუსიკალური აპარატურა.
უილიამსა პირველი რეპეტიცია გუშინ უკვე გაიარა და სპეციალურად ქართველი მსმენელისთვის შერჩეულ რეპერტუარს დღეს საღამოს 38 ათასიანი აუდიტორიის წინაშე შეასრულებს.