საბოლოო ჯამში, შეიძლება ითქვას, რომ საქართველომ ღირსეულად გაიარა ეს 25 წელი, ჩვენ ავაშენეთ ჩვენი სახელმწიფოებრიობა, - ამის შესახებ საქართველოს პრემიერ-მინისტრმა, გიორგი კვირიკაშვილმა "დროის კაფსულის" შენახვის ცერმონიალის დროს განაცხადა.
მისი თქმით, საქართველომ განვლო მნიშვნელოვანი 25 წელი, რომელიც სახელმწიფოს თავიდან მშენებლობის პერიოდი იყო. პრემიერის განცხადებით, საქართველო არის პატარა ქვეყანა და ერთადერთი რაც გადაარჩეს ეს არის ერთიანობა.
„იყო მარცხიც, იყო სამოქალაქო ომიც, იყო ტერიტორიული მთლიანობისთვის ბრძოლაც, მაგრამ, საბოლოო ჯამში, შეიძლება ითქვას, რომ საქართველომ ღირსეულად გაიარა ეს 25 წელი. ჩვენ ავაშენეთ ჩვენი სახელმწიფოებრიობა, ჩვენ გვაქვს დღეს მკაფიო მიზნები, რომლის გარშემოც მთელი ერი უნდა გაერთიანდეს. ჩვენ თავი უნდა დავანებოთ ერთმანეთისთვის შეურაცხყოფის მიყენებას, უნდა გავერთიანდეთ, განვიმსჭვალოთ მთლიანად მთელი ერი სიყვარულით და ერთად ვაშენოთ ჩვენი ქვეყანა. ჩვენ ვართ პატარა ქვეყანა, ერთადერთი რაც გადაგვარჩენს, იქნება ერთიანობა. სწორედ ეს არის დღეს მნიშვნელოვანი, რომ გავერთიანდეთ მკაფიო, დადებითი მომავლის მიზნების გარშემო,“- განაცხადა გიორგი კვირიკაშვილმა.
