ხვალ, 27 მაისს, 14:00 საათზე „ისრაელის სახლში“ (თბილისი, თავისუფლების მოედანი N4, მეორე სართული) საქართველოს ტურისტული პოტენციალის შესახებ ებრაულენოვანი წიგნის პრეზენტაცია გაიმართება. წიგნის ავტორია ისრაელელი სტუდენტი კორალ კრატენშტენი. ეს მისი ავტორობითა და საქართველო-ისრაელის ბიზნეს პალატის სპონსორობით საქართველოს ტურიზმის შესახებ ისრაელში გამოცემული უკვე მეორე წიგნია. პირველ წიგნს „21 დღე საქართველოში“ დიდი გამოხმაურება მოჰყვა ისრაელში და ორგანიზატორები იმედოვნებენ, რომ წიგნის მეორე ნაწილიც - „საქართველო: მაღალ ქუსლებზე, ჯინსებით თუ ჰალსტუხით“ თავის წვლილს შეიტანს საქართველოს ტურიზმის პოპულარიზებასა და ისრაელიდან ტურისტების რაოდენობის ზრდაში.
წიგნის პირველ გვერდებზე განთავსებულია პროექტის მხარდამჭერის - საქართველოს ტურიზმის ეროვნული ადმინისტრაციის ხელმძღვანელისა და სპონსორის - საქართველო-ისრაელის ბიზნეს პალატის პრეზიდენტისა და ისრაელის სახლის დამფუძნებლის მიმართვა და მილოცვები. წიგნში საუბარია ტურიზმის ახალ მიმართულებაზე - „ვიზიტი საქართველოში კვირის ბოლოს“, სადაც ავტორი აღწერს, რისი დათვალიერება შეიძლება მოასწრნონ საქართველოში მხოლოდ 2-3 დღით ჩამოსულმა ტურისტებმა. მისი მთავარია მიზანია, აჩვენოს ისრაელის საზოგადოებას, რომ საქართველო არის არა მხოლოდ კულინარიისა და ლამაზი ხედების, არამედ მრავალსაუკუნოვანი მაღალი კულტურის, მდიდარი ისტორიისა და ტრადიციების ქვეყანა.
პრეზენტაციას დაესწრებიან ისრაელის საპარლამენტო დელეგაციის წევრები და საქართველოს ტურიზმის ეროვნული ადმინისტრაციის ხელმძღვანელი გიორგი ჩოგოვაძე.
როგორც საქართველო-ისრაელის ბიზნეს პალატის პრეზიდენტი აცხადებს, წიგნის გამოშვება ისრაელის პრესტიჟულ გამომცემლობაში ისრაელელი ავტორის (არა ქართველი ებრაელის) მიერ, იმის ხაზგასმაა, რომ არა მხოლოდ იზრდება ტურისტული ნაკადი ისრაელიდან, არამედ კავშირები ქვეყნებს შორის გადადის მთავრობებსა და საზოგადოებებს შორის კავშირების დონეზე - ანუ მივიწევთ მიზნისკენ, რომელსაც ისრაელის სახლის საქმიანობა ემსახურება.
პრეზენტაციაზე გაკეთდება განცხადება საქართველოდან ისრაელში და პირიქით, ტურისტული ნაკადის გაზრდისათვის აუცილებელ ნაბიჯებზე, მათ შორის საქართველო-ისრაელის ბიზნეს პალატის გადაწყვეტილებაზე, მიმართოს შუამდგომლობით ისრაელის ტურიზმის სამინისტროს ისეთი მექანიზმის შესამუშავებლად, რომელიც გაუადვილებს ქართულ ტუროპერატორებს ისრაელის მიმართულებით მუშაობას და, მეორე მხრივ, შექმნის გარანტიას, რომელიც გამორიცხავს ტურისტთა ისრაელში არალეგალურად დარჩენას.