პარლამენტის ფრაქცია „თავისუფალი დემოკრატების“ თავმჯდომარის ირაკლი ჩიქოვანის განცხადებით, შინაგან საქმეთა სამინისტროს შესყიდვების სამსახურის ყოფილი უფროსის გიორგი ბაჯელიძის განცხადება ე.წ. კაბელების საქმეზე სისხლის სამართლის დანაშაულია და მასზე გამოძიება უნდა დაიწყოს. ჩიქოვანი გადაცემა P.S.-ში გასულ სიუჟეტს გამოეხმაურა და ჩხენკელის, დანელიასა და ჯანყარაშვილის დაკითხვას მოითხოვენ
მისი თქმით, ბაჯელიძემ ე.წ. კაბელების საქმეზე გასულ სიუჟეტში განაცხადა, რომ მას კონკრეტული თანამდებობის პირები შსს-ში აიძულებდნენ სახელმწიფო შესყიდვების კანონის გვერდის ავლით კონტრაქტი გაეფორმებინა კონკრეტულ კომპანიასთან და განეხორციელებინა მომსახურება შსს-სთვის.
„ვთვლით, რომ აღნიშნულ სიუჟეტში ბატონი ბაჯელიძის მიერ გაკეთებული განცხადებები იმასთან დაკავშირებით, რომ მას კონკრეტული თანამდებობის პირები საქართველოს შინაგან საქმეთა სამინისტროში აიძულებდნენ, სახელმწიფო შესყიდვების კანონის გვერდის ავლით კონტრაქტი გაეფორმებინა კონკრეტულ კომპანიასთან და მას განეხორციელებინა მომსახურება შინაგან საქმეთა სამინისტროსთვის, არის სისხლის სამართლის დანაშაულის ნიშნის შემცველი და დღესვე, პროკურატურამ უნდა დაიწყოს გამოძიება ამ საკითხთან მიმართებაში“, - განაცხადა ჩიქოვანმა.
მისივე თქმით, ასევე, აუცილებლად უნდა იქნეს გამორკვეული ის საიდუმლო ბრძანება, რის საფუძველზეც, ჩიქოვანის განცხადებით, როგორც ჩანს, მოხდა ამ შესყიდვების გაფორმება.
,,ნახსენები იყო კონკრეტული გვარები, რომელიც იმ პერიოდისათვის მუშაობდნენ შსს-ში, ესენია არიან ბატონები - ჩხენკელი, დანელია და ჯანყარაშვილი, რომლებსაც, როგორც ბაჯელიძის ნათქვამიდან ჩანს, ჰქონდათ კონკრეტული ინტერესი ამ საკითხთან მიმართებაში. ამ ადამიანების გამოკითხვა აუცილებელია“, - განაცხადა ჩიქოვანმა.
შეგახსენებთ, გიორგი ბაჯელიძემ, რომელიც შსს-ში შესყიდვების სამსახურის უფროსად, 2013 წელს ირაკლი ღარიბაშვილის მინისტრობისას მუშაობდა, გადაცემა P.S.-ში ე.წ. კლანურ მმართველობაზე და მინისტრ ღარიბაშვილის „ნათესავებისთვის გადაცემულ ძალაუფლებაზე“ ისაუბრა.
მისი თქმით, თავდაცვის სამინისტროს ყოფილი თანამშრომლები ხელისუფლებამ პოლიტიკურ თამაშებს შესწირა. ბაჯელიძე იმ გრიფით საიდუმლო ხელშეკრულების გასაჯაროებას ითხოვს, რომელიც შს ყოფილმა მინისტრმა ღარიბაშვილმა საიდუმლო სპეციალური კავშირის უზრუნველყოფისათვის, ერთ-ერთი კომპანიას გაუფორმა.
