რამდენიმე დღის წინ სოციალურ ქსელში მეგობარმა მომწერა, რომ ქართულ-ფრანგულ კანონებს, საქართველოში მოღვაწე ფრანგი ქალბატონი, კატერინე რუსსელლი (Catherine Rousselle) სასიკვდილოდ ჰყავს განწირული.
აღმოჩნდა, რომ მას საქართველოში საფრანგეთის საელჩო იმის გამო ვერ ეხმარება, რომ ასეთი ხარჯების გაწევის უფლებას, კანონი არ აძლევს, ხოლო საქართველოს ჯანდაცვის კანონმდებლობა უფლებას არ იძლევა უცხო ქვეყნის მოქალაქეს დაეხმაროს. ეს მხოლოდ შინაარსი იყო იმის, რაც გავიგე.
შემდეგ დავადგინე, რომ არც კერძო სადაზღვევო კომპანიები აფორმებენ ხელშეკრულებებს ონკოდაავადებულებთან და სხვა თუ არაფერი, ადამიანისთვის ტკივილგამაყუჩებელი პრეპარატებიც კი არ შეიძლება რაიმე შეღავათით გაიცეს.
მოკლედ, ორი სახელმწიფოს ინსტიტუტები ადამიანს სასიკვდილოდ იმეტებენ.
ფეისბუკზე კატერინეს მეგობრობის თხოვნა გავუგზავნე და მივწერე, იქნებ დეტალურად აეხსნა რა ხდებოდა. რამდენიმე დღის შემდეგ პასუხიც მივიღე, რომელმაც სულით-ხორცამდე შემძრა და ამ პასუხს - ანუ კატერინეს ამბავს ქვემოთ ვაქვეყნებ. მანამ კი მინდა მოგმართოთ ყველას- ქართველებს, ფრანგებს, ბიზნესმენებს, სამედიცინო დაწესებეულებების ხელმძღვანელებს, ჯანდაცვის მუშაკებს , სადაზღვევო კომპანიებს - დავუმტკიცოთ კატერინეს, რომ ადამიანის ბუნება უმადურება კი არა - მადლიერებაა, ხოლო მორალი ყველა კანონზე მაღალი კანონია.
აი, რა მომწერა კატერინემ, ბოდიში, რომ წერილის ამონარიდს მასთან შეთახმების გარეშე ვაქვეყნებ:
”ჯანმრთელობის პრობლემა მაქვს, გართულების გამო შეუძლებელია ჩემი გადაადგილება ჩემს ქეყანაში - უცებ წავიდა სიმსივნის მზარდი პროცესი. სამწუხაროდ, ჩემს საკონსულოს ასეთი შემთხვევისთვის თანხა და ბიუჯეტი არ გააჩნია, რომ აქ ადგილზე დამეხმაროს. საქართველოში კი, მიუხედავად ჩემი დიდი დამსახურებისა, კანონმდებლობა არ აძლევთ საშუალებას, რამე ფონდი დამეხმაროს როგორც უცხოელს. შესაბამისად, არც დაზღვევა მაქვს და ვერც კერძო დაზღვევა ხერხდება, რადგან ვარ ონკოპაციენტი. არც ის შემიძლია, რომ დავდგე ძლიერი გამაყუჩებლების აღრიცხვაზე. პირდაპირ მიწევს ღირებულების გადახდა.
ამოიწურა ყველა რესურსი, უკვე ოთხი ოპერაცია ჩამიტარდა. ურთულეს მდგომარეობაში აღმოვჩნდი.
თუმცა კი, მოგახსენებთ, რომ საქართველოში უკვე თითქმის 3 წელია ვმოღვაწეობ. ვარ ერთ-ერთი ორგანიზაციის კეთილი ნების ელჩი, სადაც სხვადასხვა სფეროში გამოცდილების გაზიარების კუთხით უამრავი პროექტი გავაკეთე. ვარ საერთაშორისო აუდიტორთა და ბუღალტერთა მარეგულირებელი ორგანოს ვიცე-პრეზიდენტი და საქართველოსთვის გამოცდილების ასამაღლებლად კავშირი დავამყარე ამერიკის საერთაშორისო ფედერაციასთან. ასევე ვარ საერთაშორისო ქართულ-ფრანგული ორგანიზაციის პრეზიდენტი. ამ კუთხით მრავალმხრივი თანამშრომლობა მაქვს ქუთაისის და თბილისის მერიებთან. ურთიერთობები ჩამოვაყალიბე სტრასბურგისა და თბილისის მერებს შორის.
საქართველოში უცხოელი მოსწავლეებისთვის საჯარო სკოლა გახლდათ ფასიანი, ჩემი ძალისხმევით 2015 წლიდან ეს ნორმა მოიხსნა.
ვეხმარებოდი სხვადასხვა ორგანიზაციებს, ჩვილ ბავშვთა სახლებს, ვინახავდი სოციალურად დაუცველ ოჯახებს, ვეხმარებოდი რამდენიმე პენსიონერს.
სულ ეს არის, ალბათ გამომრჩა ბევრი რამ, მაგრამ ამას ვაკეთებდი და ვაკეთებ იმიტომ, რომ მიყვარს საქართველო. ჩემს ბავშვს ქართული საფრანგეთში ვასწავლე. აქ ცოტა ხანს დადიოდა ფრანგულ სკოლაში, შემდეგ ჩვეულებრივ - საჯარო სკოლაში დადის. ის 11 წლისაა და ამბობს, თბილისელი ფრანგი ვარო. შევაყვარე საქართველო. მღერის ქართულად. ...
მადლობა”, - მომწერა კატერინე რუსსელლმა.
და ბოლოს, კიდევ ერთხელ მოგმართავთ ყველას - დავეხმაროთ კატერინეს! დავუმტკიცოთ მის 11 წლის შვილს, რომ ადამიანებისთვის ყველაზე დიდი ღირებულება ადამიანია და ამით შევაყვაროთ არა მხოლოდ საფრანგეთი და საქართველო, არამედ ადამიანი!
კატერინეს შვილს დედა სჭირდება, კატერინს მისი შვილი. ჩვენ კი შეგვიძლია მათ ერთმანეთი ვაჩუქოთ.
განსაკუთრებით გთხოვთ ჟურნალისტებს, გამომცემლებს, დაფუძნებლებს, პროდუსერებს, მფლობელებს დაინტერესედით ამ თემით მხოლოდ დადებით კონტესტში, ახლა იმის რკვევის დრო არ არის ვინ დაწერა ცუდი კანონი და ვინ ვერ სცდება კანონის ჩარჩოებს. ახლა, კატერინეს დახმარების დროა და ჩვენ ეს უნდა შევძლოთ.
თანადგომის იმედით,
გოჩა მირცხულავა
პ.ს. დიდი ძალისხმევა დამჭირდა, რომ კატერინესთვის საბანკო ანგარიში გამომერთმია.
სს "საქართველოს ბანკი" ბანკის კოდი BAGAGE22
მიმღების ანგარიშის ნომერი GE02BG0000000368858600
რუსსელლ კატერინე
