ლატვიის ეროვნულ ბიბლიოთეკაში ამერიკაში მოღვაწე ქართველი ხელოვანის დავით დათუნაშვილის (დევიდ დათუნა) მიერ შექმნილი ნამუშევრის ლატვიის სახელმწიფოსთვის საჩუქრად გადაცემის ოფიციალური ცერემონია გაიმართა. ხელოვანმა ლატვიის რესპუბლიკას უნიკალური სტილით შექმნილი ლატვიის ეროვნული დროშა უსახსოვრა.
ღონისძიებას დაესწრნენ ლატვიის პრეზიდენტი რაიმონდს ვეიონისი, ლატვიის რესპუბლიკაში საქართველოს საგანგებო და სრულუფლებიანი ელჩი და სხვა საპატიო სტუმრები.
რაიმონდს ვეინოსიმ მისასალმებელი სიტყვით მიმართა დამსწრე საზოგადოებას და საკუთარ გამოსვლაში აღნიშნა, რომ ლატვიის რესპუბლიკისთვის ძალზედ სიმბოლური და მნიშვნელოვანია ასეთი ძვირფასი საჩუქარი და მადლობა გადაუხადა როგორც თვითონ ნამუშევრის ავტორს, ისე ქართულ და ამერიკულ მხარეებს.
ცერემონიაზე მისასალმებელი სიტყვით წარსდგნენ ასევე საქართველოს ელჩი თეიმურაზ ჯანჯალია, ლატვიის ეროვნული ბიბლიოთეკის დირექტორი, ანდრის ვილკსი და ლატვიაში ამერიკის შეერთებული შტატების ელჩი, ნენსი ბიკოფ პტიტი.
აღსანიშნავია, რომ ქართველი ხელოვანის მიერ შექმნილი ნამუშევარი - ლატვიის ეროვნული დროშა შესრულებულია სრულიად განსხვავებული და უნიკალური სტილით. ნამუშევარში გამოყენებულია ლინზები, რომლებშიც მოთავსებულია ლატვიის ისტორიის ამსახველი ფოტო-სურათები.
ნამუშევრის ავტორმა, დავით დათუნაშვილმა ვერ შეძლო აშშ-იდან ლატვიაში ჩასვლა და ღონისძიებაზე დასწრება. ცერემონიალის ფარგლებში, მისი მიმართვა „არტ რიგას“ წარმომადგენელმა წაიკითხა.
საზეიმო ღონისძიებას ესწრებოდნენ ლატვიის სამეცნიერო და კულტურის სფეროს მოღვაწეები და ლატვიაში არსებული ქართული დიასპორის წარმომადგენლები.
ცერემონიის ოფიციალური ნაწილის დასრულების შემდგომ გაიმართა მცირე მიღება, სადაც სტუმრებისათვის განკუთვნილ ლატვიის ეროვნული ბიბლიოთეკის წიგნში თეიმურაზ ჯანჯალიამ სამახსოვრო ჩანაწერი დატოვა.
ღონისძიება ფართოდ გაშუქდა ლატვიის პრეზიდენტის ადმინისტრაციის პრეს სამსახურის, ლატვიის ტელევიზიებისა და ინტერნეტ საინფორმაციო სააგენტოების მიერ.
