’თავისუფალი დემოკრატების’’ ლიდერები ირაკლი ალასანია, ნინო გოგუაძე, ირაკლი ჩიქოვანი და ვიქტორ დოლიძე ე.წ. კაბელების საქმის ბრალდებულების ადვოკატებთან ერთად IDFI-ს, TI-ს, CIDA-ს, NDI - ს, IRI-ს და საქართველოში მომუშავე სხვა არასამთავრობო ორგანიზაციის წარმომადგენლებს შეხვდნენ. შეხვედრაზე მათ არასამთავრობო ორგანიზაციის წარმომადგენლებს საქმის დეტალები გააცნეს.
საუბარი შეეხო იმ გადაცდომებს და კანონდარღვევებს, რომელსაც პროცესის მიმდინარეობის დროს პროკურატურის მხრიდან ჰქონდა ადგილი. ‘’თავისუფალი დემოკრატების’’ ოფისში შეკრებილი არასამთავრობო ორგანიზაციის წარმომადგენლებმა შეხვედრის დამთავრების შემდეგ განაცხადეს, რომ ისინი ე.წ. კაბელების საქმეს აქტიურად დააკვირდებიან და მონიტორინგს გაუწევენ. საქმის ადვოკატებისგან არასამთავრობო ორგანიზაციის წარმომადგენლებმა მიიღეს დაცვის მხარისა და ბრალდების მხარის დასკვნითი სიტყვები. შეხვედრაზე თხუთმეტამდე არასამთავრობო ორგანიზაცია იმყოფებოდა.
„შეხვედრა სამართლებრივ ასპექტებს მიეძღვნა. ის, რომ პოლიტიკური დაკვეთაა, საზოგადოებისთვის უკვე ცნობილია. ბატონმა სოსო ბარათაშვილმა, საქმის მთავარმა ადვოკატმა არასამთავროებოებს გააცნო თუ როგორ არის ბრალდების არგუმენტები გაბათილებული. ამ ყველაფერმა უნდა შექმნას განწყობილება, რომ იყოს კანონზე დაფუძნებული გადაწყვეტილება“, - განაცხადა ირაკლი ალასანიამ.
„გავეცანით სამართლებრივ თითქმის ყველა ასპექტს. ბევრი კითხვა არსებობს უშუალოდ პროცესთან დაკავშირებით. ბევრი საკითხი ერთმანეთთან ისეა დაკავშირებული, რომ არა სამართლებრივ, არამედ ვფიქრობ, პოლიტიკურ საკითხთან გვაქვს საქმე. დღეს სასამართლო დიდი გამოწვევის წინაშე დგას, რათა სამართლიანი გადაწყვეტილება მიიღოს“, - განაცხადა “ინფორმაციის თავისუფლების განვითარების ინსტიტუტის” დირექტორმა გიორგი კლდიაშვილმა.
