თბილისის სასწრაფო სამედიცინო დახმარების ცენტრმა ბრიტანული ცენტრის წმინდა ნიკოლოზის სახელობის სკოლის უფროსკლასელებს უმასპინძლა.
ტრენინგცენტრში მოსწავლეები პირველად სარეანიმაციო ღონისძიებებს გაეცნენ და მანიკენებზე თავად სცადეს სამედიცინო დახმარებისთვის აუცილებელი ელემენტარული მანიპულაციის ჩატარება.
სასწრაფო სამედიცინო დახმარების ცენტრის დირექტორის გიორგი ბუთხუზის განცხადებით, დღესდღეობით საზოგადოებაში გაზრდილია ინტერესი ცენტრის საქმიანობის მიმართ. დღევანდელი ღონისძიება საგანმანათლებლო ხასიათს ატარებს. სკოლის მოსწავლეები გაეცნენ იმ ღონისძიებებს, რომელიც აუცილებელია პირველადი სამედიცინო დახმარების აღმოსაჩენად. მისივე თქმი უკვე იციან ის ელემენტარული მანიპულაციები, რომელიც, შესაძლოა, ნებისმიერ მომენტში გამოადგეთ.
როგორც მოსწავლეებმა განაცხადეს, ასეთი ტრენინგი მათთვის ძალიან საინტერესო და მნიშვნელოვანია, რადგან შესაძლოა, თავად აღმოჩნდნენ ისეთ ვითარებაში, როცა ახლობელისთვის გადაუდებელი დახმარების აღმოჩენა გახდეს საჭირო.
დღესვე ბრიტანული ცენტრის წმინდა ნიკოლოზის სახელობის სკოლა სოციალურ აქცია „მე გზას ვუთმობ სასწრაფოს“ შეუერთდა.
