წმინდა სვიმონ კანანელის სახელობის მლოცველთა ჯგუფი, საქართველოს კათოლიკოს-პატრიარქის, უწმინდესისა და უნეტარესის, ილია მეორის კურთხევით 4 მაისიდან 23 მაისის ჩათვლით, აპირებს ფეხით განვლოს გზა მცხეთიდან ენგურის ხიდამდე.
მლოცველთა ჯგუფს, ძირითადად, საქართველოს ოკუპირებული ტერიტორიებიდან დევნილი პირები შეადგენენ. ჯგუფს ხელმძღვანელობს არქიმანდრიტი გიორგი გურჩიანი.
მლოცველთა ჯგუფმა მსვლელობა მცხეთიდან, სვეტიცხოვლის საკათედრო ტაძრიდან დაიწყო.
წმინდა სვიმონ კანანელის სახელობის მლოცველთა ჯგუფი ყოველდღიურად, საშუალოდ, 20 კმ-ს ფეხით გაივლის. ყოველი დილა დაიწყება სამადლობელი ლოცვით, საღამოს კი შესრულდება სამადლობელო ლოცვა და პარაკლისი. ამასთან, მსურველებს საშუალება ექნებათ, აღნიშნულ გზას სხვადასხვა ეტაპზე შეუერთდნენ.
მსვლელობა წმინდა სვიმონ კანანელის ხსენების დღეს, 23 მაისს ენგურის ხიდთან დასრულდება. წმინდა სვიმონ კანანელის მლოცველთა გზას მართლმადიდებელ მლოცველთა ჯგუფი პირველად გაივლის.
მსვლელობაში მონაწილეობა მიიღეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის ავტონომიური რესპუბლიკის მთავრობის წევრებმა, დევნილმა სასულიერო და საერო პირებმა. მსვლელობას დახმარება გაუწია დევნილობაში აფხაზეთის მთავრობამ.