გაერო-ს რასობრივი დისკრიმინაციის აღმოფხვრის კომიტეტმა 2016 წლის 2-3 მაისს ჟენევაში, საქართველოს მთავრობის მიერ 2014 წლის 2 ივლისს, „რასობრივი დისკრიმინაციის ყველა ფორმის აღმოფხვრის შესახებ“ საერთაშორისო კონვენციის შესაბამისად წარდგენილი მე-6, მე-7 და მე-8 პერიოდული ანგარიშები განიხილა.
საგარეო საქმეთა სამინისტროს ინფორმაციით, საქართველოს დელეგაციაში სხვადასხვა უწყებების წარმომადგენლები მონაწილეობდნენ. დელეგაციას კი, საქართველოს მხრიდან საგარეო საქმეთა მინისტრის მოადგილე, ხათუნა თოთლაძე ხელმძღვანელობდა.
უწყების ინფრმაციით, სხდომის დასაწყისში, დელეგაციის ხელმძღვანელმა ინფორმაცია საქართველოს მიერ კონვენციის იმპლემენტაციის თაობაზე და ამ მიმართულებით განხორციელებულ რეფორმებზე წარადგინა, სადაც აქცენტები საქართველოს ოკუპირებულ ტერიტორიებზე არსებულ ადამიანის უფლებათა მდგომარეობაზე და ეთნიკური ნიშნით ქართველების დევნა-შევიწროებაზე გაკეთდა.
ინტერაქტიული დიალოგის ფორმატში და კითხვა-პასუხის რეჟიმში, საქართველოს დელეგაციამ უპასუხა კითხვებს და კომიტეტის წევრებს დასმულ საკითხებზე დეტალური ინფორმაცია მიაწოდა.
ამასთან, საკომიტეტო განხილვების დროს, საქართველოს სახალხო დამცველის მოადგილემ საქართველოში კონვენციის შესრულების თაობაზე წარადგინა ინფორმაცია.
როგორც საგარეო საქმეთა სამინისტროში აცხადებენ, ორდღიანმა სამუშაო სხდომამ ღია დიალოგის რეჟიმში ჩაიარა და მონაწილეებს საშუალება მიეცათ გაეცვალათ ინფორმაცია კონვენციის იმპლემენტაციის სხვადასხვა საკითხებზე.
განხილვის შედეგად კომიტეტი მიიღებს დასკვნით მოსაზრებებს, რომელშიც რეკომენდაციები იქნება მოცემული.
