აჭარაში მოქმედ მუზეუმებში სპეციალური საგანმანათლებლო გაკვეთილები და მოდულები შემუშავდება. მუზეუმები მათი სპეციფიკიდან, ექსპოზიციების შინაარსიდან გამომდინარე შექმნიან საგანმანათლებლო პროგრამების, რაც კიდევ უფრო საინტერესოს, ინტერაქტიულს გახდის მუზეუმს და ამასთანავე მოზარდებს მისცემს შესაძლებლობას ავთენტური ექსპონატების მეშვეობით შეიგრძნონ, ჩასწვდნენ, გააანალიზონ და იმსჯელონ ისტორიულ, სოციალურ, სახელოვნებო საკითხებზე.
აჭარის განათლების, კულტურისა და სპორტის სამინისტროს პროგრამის ფარგლებში მუზეუმების თანამშრომლებისთვის საგანმანათლებლო პროგრამების მიმართულებით ტრენინგები და ვორკშოფები ჩატარდება. ტრენინგების თემატიკა შეეხება ისეთ საკითხებს, როგორიცაა სამუზეუმო განათლება, განათლება დღევანდელ მუზეუმებში, სამუზეუმო საგანმანათლებლო პროგრამების კურიკულუმი, პროექტში ჩართული თითოეული მუზეუმისათვის რელევანტური სამუზეუმო საგანმანათლებლო პროგრამების პროექტის შემუშავება და მათი ანალიზი, საპილოტე ვერსიების აპრობაცია, შედეგების ანალიზი, სამუზეუმო საგანმანათლებლო პროგრამების შესახებ ინფორმაციის გავრცელების მექანიზმები და სხვა.
თითოეული მუზეუმი შეიმუშავებს და წარმოადგენს მინიმუმ თითო საგანმანათლებლო პროგრამას, რომელიც სამომავლოდ სისტემატიურად დაიგეგმება და განხორციელდება მუზეუმების მიერ. პროექტში მონაწილეობას მიიღებენ აჭარის არქეოლოგიური მუზეუმის, ხარიტონ ახვლედიანის სახელობის სახელმწიფო მუზეუმის, ქობულეთის მუზეუმის, ქედის ისტორიული მუზეუმის, ასევე ხულოს მხარეთმცოდნეობის მუზეუმის თანამშრომლები.
„მუზეუმის თანამშრომელთათვის მნიშვნელოვანია ფორმალური და არაფორმალური სასწავლო პროგრამების შემუშავება და დანერგვა მუზეუმების მენეჯმენტის გაუმჯობესებისა და მათი პოპულარიზაციის მიზნით, ასევე მუზეუმის, როგორც საგანმანათლებლო-კვლევითი დაწესებულებისა და საზოგადოებრივი ცენტრის განვითარების მხარდაჭერას, სხვადასხვა სახის პროგრამების, მათ შორის, საბავშვო პროგრამების, შემუშავებისა და დანერგვის გზით“ - აღნიშნავს ნათია სირაბიძე.
2016 წლის 14 აპრილს სამუზეუმო საგანმანათლებლო პროგრამების შემუშავებისა და აპრობაცია/დანერგვისათვის აუცილებელი ტრენინგების/ვორკშოპების სერიის ჩატარების მიზნით გამოცხადდა ტენდერი. განაცხადის ნომერი SPA160011762. წინადადებების მიღება იწყება 01.05.2016 00:00 და მთავრდება 06.05.2016 12:00 სთ.
