იუსტიციის უმაღლესი საბჭოს წევრი ევა გოცირიძე არასამთავრობო ორგანიზაციების წარმომადგენლებს აკრიტიკებს და აცხადებს, რომ დამკვირვებლები, რომლებიც მათთან ხშირად მოდიან, ძალიან ცუდ შთაბეჭდილებას ტოვებენ. მისი შეფასებით, არასამთავრობოების პასუხისმგებლობა და საქმიანობა ხშირად ნულის ტოლია.
„კანონშიც ბევრი ხარვეზია და ჩვენს საქმიანობაშიც ბევრი ხარვეზია, ისევე როგორც თქვენს საქმიანობაში არის ძალიან ბერვი ხარვეზი. მე მინდა, თქვენი ყურადღება მივაქციო იმ გარემოებასაც, რომ დამკვირვებლები, რომლებიც ჩვენთან ხშირად მოდიან, ძალიან ცუდ შთაბეჭდილებას ტოვებენ. როდესაც გავხედავ თქვენ დამკვირვებლებს, ყველა მათგანს ტელეფონში აქვს თავი ჩარგული და მხოლოდ მესიჯობით არიან დაკავებული. ეს ძალიან ცუდ შთაბეჭდილებას ახდენს. ეს მხოლოდ იუსტიციის საბჭოში არ ხდება. მე მქონია ასეთივე ტიპის ერთობლივი შეხვედრებში მონაწილეობის შესაძლებლობა უცხოეთშიც და იქაც თქვენი წარმომადგენლების ჩართულობის და პასუხისმგებლობოს ხარისხი იყო ნულის ტოლი”, - განაცხადა გოცირიძემ.
მისვე თქმით, ხშირად გაუგებარია, არასამთავრობოების შენიშვნები.
„თქვენ არ გინდათ, რომ დადებითი მხარეებიც თქვათ. საუბარი და ბრალდება, რომ იუსტიციის საბჭოს წევრებს შორის არ არის განსხვავებული აზრი, არ შეესაბამება სიმართლეს”, - მიმართა გცორიძემ არასამთავრობების წარმომადგენლებს.
არასამთავრობო სექტორმა იუსტიციის უმაღლესი საბჭოს წევრებს დღეს საბჭოს საქმიანობის მონიტორინგის 2015 წლის ანგარიში გააცნო. სხვა ხარვეზებთან ერთად ანგარიშში მოსამართლეთა შერჩევა-დანიშვნის პროცესში არსებულ დარღვევებზეა საუბარი.
