თბილისის მერიის ქონების მართვის სააგენტოს უფროსი კარლო ლაფერაძე აუქციონში გამარჯვებული კომპანიის  - „ალმა-ტრანსპორტის“  ხელმძღვანელს  გიორგი ტრაპაიძეს შეხვდა.   კომპანია „ალმა-ტრანსპორტი“ დედაქალაქის მასშტაბით ავტობუსის 700 ახალ მოსაცდელ კონსტრუქციას  განათავსებს. 

თბილისის მერიამ დედაქალაქის მასშტაბით ავტობუსის მოსაცდელი კონსტრუქციების  განთავსების მიზნით  700 ადგილი  შეარჩია. მიწის იჯარით გაცემის შესახებ  აუქციონი  მიმდინარე წლის  25 მარტს გამოცხადდა   და   4  აპრილს დასრულდა.  აუქციონში გამარჯვებული კომპანია „ალმა-ტრანსპორტი“ მოსაცდელების მონტაჟს 40 დღეში დაიწყებს და 2017 წლის მაისამდე  დაასრულებს.

ავტობუსების მოსაცდელების ნაწილი ლედ ეკრანებით აღიჭურვება.  მიწის ნაკვეთები  20 წლიანი იჯარის უფლებით აუქციონის ფორმით გაიცემა.  იჯარის საზღაური  თვეში 1 კვ.მ-ზე   7 ლარით განისაზღვრა.   

გამარჯვებულმა კომპანიამ ავტობუსის მოსაცდელების განთავსებისთვის არანაკლებ 5 მილიონი ლარის ინვესტიცია უნდა განახორციელოს. აუქციონის პირობების თანახმად,  დაახლოებით 1,3 მეტრი სიგანის და 3-დან 5 მეტრამდე სიგრძის საქალაქო ტრანსპორტის მოსაცდელი  ადაპტირებული იქნება შეზღუდული შესაძლებლობის მქონე პირთათვის.