ტექნიკური უნივერსიტეტის თანამშრომელთა ნაწილმა შიმშილობა დროებით შეწყვიტა. ამ გადაწყვეტილებას ისინი სააღდგომო დღესასწაულებს უკავშირებენ და აცხადებენ, რომ ამ პერიოდში პროტესტის გაგრძელება „სარწმუნოებრივად არ იქნებოდა სწორი.“ უკვე ყოფილი მოშიმშილეები ასევე განმარტავენ, რომ ისინი უნივერსიტეტის რექტორს 2-კვირიან ვადას აძლევენ გადადგომისთვის.
არჩილ ფრანგიშვილის გადადგომის მოთხოვნით მოშიმშილე პირებიდან მხოლოდ ერთი, ფირან კობიაშვილი არ უერთდება კოლეგების გადაწყვეტილებას და შიმშილობას აღდგომის დღესასწაულებზეც განაგრძობს.
ტექნიკური უნივერსიტეტის საზოგადოებასთან ურთიერთობის სამსახურის უფროსი დარეჯან მეფარიშვილი „ჯი-ეიჩ-ენთან“ საუბარში ამბობს, რომ შიმშილობის აქციაში უნივერსიტეტის ოთხი თანამშრომელი მონაწილეობდა და ოთხივემ აქცია შეწყვიტა.
“წინ გველოდება სასამართლო პროცესი, რომელსაც თავად მიმართეს აქციის მონაწილეებმა. სამწუხაროა, რომ ისინი ქართულ მართლმსაჯულებას არ სცნობენ და არასამართლებრივი გზით ცდილობენ თავისი არაკანონიერი მოთხოვნის შესრულებას“, - განაცხადა „ჯი-ეიჩ-ენთან“ საუბარში მეფარიშვილმა.
რაც შეეხება ფირან კობიაშვილს, რომელიც შიმშილობას აგრძელებს, მეფარიშვილი ამბობს, რომ ის ტექნიკური უნივერსიტეტის თანამშრომელი არ არის.
„გაუგებარია, ფირან კობიაშვილის მხრიდან უნივერსიტეტის მისამართით უწმაწური ენით საუბარი. მაინტერესებს, უნივერისტეტის არათანამშრომელი, რომელიც უნივერსიტეტიდან გააგდეს, რა უფლებით ერევა ამ ყველაფერიში და კონკრეტულად ახლა, რა უფლებით რჩება უნივერსიტეტის ტერიტორიაზე, ადმინისტრატიულ კორპუსში და აგრძელებს შიმშილობის აქციას. მინდა გითხრათ, რომ თავის დროზე, კობიაშვილს დისერტაციის დაცვა ჩაუგდო ნოდარ უღრელიძემ, რომელიც ასევე შიმშილობდა კობიაშვილთან ერთად. უღრელიძე არ მალავდა რომ ერთი წლის შემდეგ, ფირან კობიაშვილმა, შანტაჟით დაიცვა დისერტაცია. შუბლში ძარღვი თუ აქვს ფირან კობიაშილს და მის ადვოკატს და ნათესავს, დავით წიქარიშვილს, როდესაც აქციის გაგრძელებაზე საუბრობენ“, - აცხადებს მეფარიშვილი.
შეგახსენებთ, რომ არჩილ ფრანგიშვილის გადადგომის მოთხოვნით სულ 5 ადამიანი შიმშილობდა.
