აჭარის ა/რ მთავრობის აპარატის წინ შუახევის ჰესის მშენებლობას აპროტესტებს სოფელ მახალაკიძეების მოსახლეობა. სოფლის წარმომადგენლებმა მთავრობის აპარატში სპეციალური განცხადება შემოიტანეს, რომელშიც მოსახლეობის მოთხოვნები და და ხელმოწერებია წარმოდგენილი. აჭარის მთავრობის ადმინისტრაცია მოთხოვნებს გაეცნო და საპასუხო წერილიც გადასცა მთავრობის აპარატის წინ შეკრებილ წარმომადგენლებს.
აღსანიშნავია, რომ შუახევიჰესის მშენებლობა უმნიშვნელოვანესი პროექტია როგორც, რეგიონის, ისე ქვეყნის მასშტაბით. ინვესტიციის მოცულობა შეადგენს 416 მილიონ ამერიკულ დოლარს. პროექტის ფარგლებში დასაქმებულია საქართველოს 730 მოქალაქე. შუახევიჰესის პროექტი პირველი ჰიდროენერგეტიკული პროექტია საქართველოში, რომელიც სერთიფიცირებულია გაეროს ჩარჩო კონვენციის კლიმატის ცვლილებების შესახებ ნახშირბადის გამოყოფის შესამცირებლად.
2017 წლის გაზაფხულიდან ჰესი ოპერირებას დაიწყებს და საქართველოს ელექტროსისტემას 187 მეგავატი სუფთა ენერგიის მწარმოებელი სადგური შეემატება. პროექტის განხორციელება ხელს შეუწყობს რეგიონის ეკონომიკურ და სოციალურ განვითარებას.
აჭარის მთავრობაში აცხადებენ, რომ სოფელ მახალაკიძეებში მიმდინარე პროცესები მოსახლეობის მოთხოვნის საფუძველზე დამატებით იქნება შესწავლილი. აღნიშნულთან დაკავშირებით შუახევის მუნიციპალიტეტში რამოდენიმე დღეა დაწყებულია კომისიის შექმნის პროცესი, კომისიაში მონაწილეობის მიღების თხოვნით ოფიციალური წერილები უკვე დაეგზავნა სხვადასხვა უწყებას. კომისიის მუშაოებაში ჩაერთვება აჭარის გარემოს დაცვისა და ბუნებრივი რესურსების სამმართველოს და სხვა უწყებების შესაბამისი სპეციალისტები.
