საბურთალოს რაიონის გამგეობის მიერ 2016 წლის პირველ კვარტალში განხორციელებული პროექტებისა და ბიუჯეტის შესრულების შესახებ შემაჯამებელი ანგარიში რაიონის გამგებელმა ბექა მიქაუტაძემ დღეს საზოგადოებრივ საბჭოებს წარუდგინა.
მერიის ინფორმაციით, ინფრასტრუქტურული, სოციალური, თანადაფინანსებული, ასევე ნოვატორული და პილოტ-პროექტები, მათ შორის თანამშრომლობა კერძო და საჯარო სექტორებს შორის, სტუდენტების ჩართულობა რაიონის კეთილმოწყობის სამუშაოებში, სპორტული, საგანმანათლებლო და კულტურული ღონისძიებები - ეს ის თემებია, რომელთა შესახებ ბექა მიქაუტაძემ დეტალურად ისაუბრა და ფოტო-მასალაც წარმოადგინა.
ანგარიშის წარდგენის შემდეგ შეხვედრა კითხვა-პასუხის რეჟიმში გაგრძელდა. ბექა მიქაუტაძემ მიმდინარე და დაგეგმილი პროექტებიც მიმოიხილა და განაცხადა, რომ თითოეული მათგანის განხორციელებაში საბჭოების წევრთა ჩართულობა და მონაწილეობა უაღრესად მნიშვნელოვანია.
„ანგარიშვალდებულება და გამჭვირვალობა ის სტანდარტია, რომელიც ჩვენ მოსვლის დღიდან დავამკვიდრეთ და ეს თანამშრომლობა მეტი ინტენსივობით უნდა გავაგრძელოთ,“ - განაცხადა გამგებელმა და მადლობა გადაუხადა სტუმრებს გამგეობის საქმიანობაში აქტიური ჩართულობისათვის.