ISIS-სთან კავშირის ბრალდებით დაკავებული პირების დედები საქმეზე გრიფით საიდუმლოს მოხსნას ითხოვენ. მირიან ბერიძის, გია ბახუნტარაძისა და ჯამბულ აბდულაევის დედები მიიჩნევენ, რომ მათ შვილებს სამხილები ჩაუდეს და სახელმწიფო მუსლიმებს დევნის. მათი განცხადებით, სირიაში წასულ ტერორისტებთან მათ შვილებს მხოლოდ მეგობრული მიმოწერა ჰქონდათ.
"აქ მეგობრობდნენ, ერთად ლოცულობდნენ და ასე ერთბაშად ხომ ვერ გაწყვეტდნენ კავშირს. სირიაში წასულები მეგობრებს, ოჯახის წევრებს და ნათესავებს წერდნენ. ამის გამო ხომ არ უნდა დააკავო მთელი სოფელი. ჩემი შვილი ემიჯნებოდა მათ ვიდეო მიმართვას" - აცხადებს მირიან ბერიძის დედა, ნათელა ბერიძე და დასძენს,რომ ისინი სარწმუნოების გამო ისჯებიან.
,, ISIS-ის დროშა ამოუღეს. ზუსტად ვიცი, რომ ეს ნივთები არ ჰქონდა და ჩაუდეს, მე ვალაგებდი ყოველდღე იმ საძნებელს. თან იარაღი, რომ ქონოდა, ჩემმა შვილმა იცის იარაღის მოხმარება და მერწმუნეთ ასე არ დანებდებოდა, პასუხს გასცემდა" - ამბობს ჯამბულ აბდულაევის დედა, მერი ვანაძე.
29 დეკემბერს ისლამურ სახელმწიფოსთან კავშირის ბრალდებით 4 პირი დააკავეს, ერთ-ერთი ბათუმელი ლაშა გობაძე იყო. სამი ბრალდებული კი სოფელ ნასაკირალში ცხოვროდნენ. ბრალდებულების სახლებიდან სამართალდამცავებმა იარაღი, ISIS-ის დროშები და სხვა მტკიცებულებები ამოიღეს. მათი დაკავება მას შემდეგ მოხდა, რაც ინტერნეტ სივრცეში ქართველი ტერორისტების მხრიდან მუქარის შემცვლელი ვიდეო მიმართვა გავრცელდა
