სასოფლო-სამეურნეო მიწების ლეგალიზებისათვის სამუშაო პროცესი გრძელდება - საბურთალოს რაიონის გამგებელი ბექა მიქაუტაძე დღეს სოფელ დიღომში იმყოფებოდა, სადაც აღნიშნული პრობლემა მოსახლეობას ყველაზე მეტად აწუხებს. მათ უმეტესობას დოკუმენტაციის მომზადებაში პრობლემები ჯერ კიდევ მიწის რეფორმის დროს შეექმნათ, თუმცა არიან ისეთებიც, ვინც მამა-პაპისეული მიწის ნაკვეთების დაკანონება წლების მანძილზე ვერ მოახერხა.
მერიის ინფორმაციით, ბექა მიქაუტაძე დღეს სოფელ დიღმის საუბნო სამსახურში იმყოფებოდა, სადაც უკვე რამდენიმე თვეა ყოველ სამშაბათსა და პარასკევს თბილისის მერიის ქონების მართვის სამსახურის სპეციალისტი მოქალაქეებს ხვდება და მიწების ლეგალიზებისათვის აუცილებელი პროცედურებისათვის კონსულტაციას უწევს.
დღევანდელ შეხვედრაზე მიმდინარე პროცესის შესახებ დეტალური ინფორმაცია გამგებელს საუბნო სამსახურის ხელმძღვანელმა მიაწოდა.
„ამ დროისათვის, მიწის ლეგალიზების მოთხოვნით ჩვენ 700-ზე მეტმა მოქალაქემ მოგვმართა, რომელთაგან 500-მა უკვე გაიარა კონსულტაციები მერიის ქონების მართვის სამსახურის წარმომადგენელთან, 200-მდე მოქალაქის დოკუმენტაცია კი თავმოყრილია გამგეობაში და გამზადებულია შემდგომი რეაგირებისათვის,“ - განაცხადა საბურთალოს რაიონის გამგებელმა ბექა მიქაუტაძემ.
გამგებელი შეხვედრაზე მყოფ რამდენიმე ადგილობრივსაც გაესაუბრა და მათი კონკრეტული პრობლემის შესახებ ინფორმაცია პირადად მოისმინა.
