თბილისის სახელმწიფო უნივერსიტეტის მოქმედმა რექტორმა, ლადო პაპავამ ჟურნალისტებს რექტორობის 3-წლიანი ანგარიში წარუდგინა. მან ყურადღება გაამახვილა სტრუქტურულ ცვლილებებზე, სამეცნიერო საქმიანობის გააქტიურებაზე, საერთაშორისო რეიტინგებში თსუ-ს წარმატებაზე, ახალ საგანმანათლებლო პროგრამებზე.
პაპავას განცხადებით, 2015 წლიდან უნივერსიტეტის ბიუჯეტიდან 525 ათასი ლარი მიზნობრივი სამეცნიერო კვლევითი პროგრამებისთვის გამოიყო და შვიდივე ფაკულტეტის წარმატებული 5-5 დოქტორანტის სწავლის საფასური უნივერსიტეტის ბიუჯეტიდან დაიფარება.
,,მიუხედავად იმისა, რომ ბევრი კარგი ცვლილება განხორციელდა, არის ისეთი საკითხებიც, რომელთა მოგვარებაც ვერ მოხერხდა. მაგალითად, ვერ მოვიპოვეთ უნივერსიტეტის საბიუჯეტო დაფინანსება. ხელისუფლებაში არ არის შესაბამისი პოლიტიკური ნება. ახლაც მივმართე პრემიერს, პრეზიდენტს და განათლების სამინისტროს თანხების გამოყოფისათვის“ ,- აღნიშნა ლადო პაპავამ.
პაპავა თსუ-ს რექტორად აკადემიურმა საბჭომ 2013 წლის 16 აგვისტოს აირჩია. 2016 წლის 30 მარტს, სტუდენტების საპროტესტო აქციების ფორნზე, პაპავამ საბჭოს თანამდებობიდან გადადგომის განცხადებით მიმართა. მან გუშინ განაცხადა, რომ მის წინააღმდეგ მთელი სახელმწიფო მანქანა ამოქმედდა, რის მიზეზადაც დაასახელა უნივერსიტეტის მიმდებარედ გაზგასამართი სადგურის მშენებლობისთვის გაწეული წინააღმდეგობა. თსუ-ს რექტორის მოვალეობის შემსრულებლის არჩევნები 20 აპრილს გაიმართება.