საქართველოს ეკონომიკისა და მდგრადი განვითარების სამინისტრო თსუ-ს რექტორობის მოვალეობის შემსრულებლის ვლადიმერ პაპავას მიერ გაკეთებულ განცხადებას "უაპელაციოს" უწოდებს. სამინისტროს მტკიცებით, "პაპავას განცხადება სიმართლეს არ შეესაბამება, როდესაც ამბობს, რომ გაზგასამართი სადგურის აშენება უნივერსიტეტის ტერიტორიაზე იგეგმებოდა". უწყება აღნიშნავს, რომ ეს ტერიტორია, 2000 კვ.მ. არასასოფლო-დანიშნულების მიწის ნაკვეთი (საკადასტრო კოდი: 01.14.06.006.026) წარმოადგენდა სახელმწიფო საკუთრებას და ის არ ეკუთვნოდა თბილისის სახელმწიფო უნივერსიტეტს.
"არც რაიმე ტიპის სარგებლობის უფლებით ჰქონდა გადაცემული უნივერსიტეტს" - აღნიშნავს სამინისტრო და დასძენს, რომ პაპავას განცხადებაში, "ფაქტობრივად, არცერთი სიტყვა სიმართლეს არ შეესაბამება".
"ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულმა სააგენტომ აღნიშნული ქონება პირობებიანი ელექტრონული აუქციონის ფორმით 2013 წლის 15 ოქტომბერს 1,02 მილიონ ლარად გაასხვისა 1,5 მილიონი ლარის ინვესტიციის განხორციელების ვალდებულებით. ხაზგასმით ვაცხადებთ, რომ აღნიშნული ქონება გასხვისდა საქართველოს მოქმედი კანონმდებლობის სრული დაცვით, ელექტრონულ აუქციონზე კონკურენციის პირობებში. ამასთან, ქონება გასხვისდა როგორც არასასოფლო-დანიშნულების მიწის ნაკვეთი და ამ პროცესში გაზგასამართი სადგურის მშენებლობის ვალდებულება გათვალისწინებული არ ყოფილა. ამასთან, ჩვენ მაშინვე დეტალურად განვმარტეთ საქმის არსი, რის შესახებაც ინფორმირებული იყო ვლადიმერ პაპავა. დარწმუნებულნი ვართ, რომ იგი ასევე შესანიშნავადაა ინფორმირებული იმის შესახებ, რომ სახელმწიფო ქონების ეროვნული სააგენტომ არსებული მიწის ნაკვეთი გაასხვისა არა რომელიმე კონკრეტული ბიზნესის ლობირების, არამედ ზოგადად ქვეყანაში ბიზნესსაქმიანობის ხელშეწყობის და ინვესტიციის განხორციელების მიზნით. სამინისტრო ამავე პოლიტიკით ხელმძღვანელობს მსგავს სხვა, ნებისმიერ შემთხვევაში. საზოგადოებას შევახსენებთ, რომ სამინისტროს მიერ წარმოებული მოლაპარაკების შედეგად ინვესტორმა გაზგასამართი სადგურის მშენებლობაზე უარი განაცხადა - ამჟამად აღნიშნულ ტერიტორიაზე შენდება მრავალფუნქციური კომპლექსი, რომელშიც საბოლოოდ 4 600 000 აშშ დოლარის ინვესტიცია განხორციელდება. ამასთან, უნდა აღვნიშნოთ, რომ ეკონომიკისა და მდგრადი განვითარების სამინისტრო საკუთარი კომპეტენციის ფარგლებში, ბოლო წლებში განსაკუთრებით ზრუნავს ივ. ჯავახიშვილის სახელობის თბილისის სახელმწიფო უნივერსიტეტის განვითარებაზე. სამინისტრომ კოალიცია „ქართული ოცნების" ხელისუფლებაში ყოფნის პერიოდში - 2012-2016 წლებში თბილისის სახელმწიფო უნივერსიტეტს სარგებლობის უფლებით 13 სახელმწიფო ქონება გადასცა" - აცხადებს ეკონომიკის სამინისტრო და აღნიშნავს, რომ "სამწუხაროდ, თსუ-ს ჯერ კიდევ მოქმედი რექტორი, ვლადიმერ პაპავა ნებსით თუ უნებლიედ, ცრუ ინფორმაციას ავრცელებს და შეცდომაში შეყავს საზოგადოება", - აცხადებენ სამინისტროში.
,,სამთავრობო წრეებში სურდათ, რომ უნივერსიტეტის მაღლივი კორპუსის მიმდებარე ტერიტორიაზე აშენებულიყო გაზგასამართი სადგური და სწორედ ამ თემაზე დაიწყო დაპირისპირება უნივერსიტეტის რექტორთან",- ამის შესახებ უნივერსიტეტის რექტროის მოვალეობის შემსრულებელმა, ლადომ პაპავამ ჟურნალისტებს განუცხადა.
ლადო პაპავამ დაასახელა უწყებები, რომლებიც ახდენდნენ ზეწოლას. პაპავას ინფომაციით, ეს უწყებები არიან დედაქალაქის მერია, ეკონომიკის სამინისტრო და ძლოვანი უწყებები.
"ჩემთვის მოულოდნელი იყო გაზგასამართი სადგურისთვის უფლების მიცემა უნივერსიტეტის სივრცეში და მერე ის თავგამოდებითი დაცვა, რომ თურმე ეს არანაირ ნორმებს არ არღვევს. ამას აკეთებდნენ სამთავრობო სტრუქტურების ცალკეული წარმომადგენლები - ქალაქის მერია, ეკონომიკის სამინისტრო. არ მგონია, უშუალოდ მინისტრები ყოფილიყვნენ ჩართული, მაგრამ იქ იყვნენ ადამიანები, რომლებიც ამას ლობირებდნენ. პროცესები უნივერსიტეტში, რაც ბოლო პერიოდში წარიმართა, იყო მართული არა მარტო ძალოვანი უწყებების მხრიდან", - განაცხადა ვლადიმერ პაპავამ.