მტკვრის დონის მომატების გამო, ასპინძის გამგეობამ საპატრულო და სამაშველო სამსახურების მობილიზაცია გამოაცხადა. გარემოსა და ბუნებრივი რესურსების დაცვის მინისტრის მოადგილე თეიმურაზ მურღულია, რომელიც გვიან ღამით ასპინძაში იმყოფებოდა, აცხადებს, რომ ამ ეტაპზე პანიკის საფუძველი არ არსებობს, თუმცა საგანგებო რეჟიმზე არიან გადასული სამინისტროს შესაბამისი სამსახურები, რათა დროულად მოხდეს შესაძლო რისკების თავიდან აცილება.
მურღულია გამოეხმაურა მედიაში გავრცელებულ ინფორმაციას თურქეთის რესპუბლიკაში კაშხლის დაზიანების შესახებ, რასაც შესაძლაო, მტკვრის დონის მოულოდნელი მატება გამოეწვია.
როგორც მინისტრის მოადგილე აცხადებს, აღნიშნული ინფორმაცია სინამდვილეს არ შეესაბამება.
„სამინისტროს უწყვეტი კომუნიკაცია აქვს თურქულ მხარესთან და მსგავს ინფორმაციას თურქული მხარე არ ადასტურებს. მტკვრის სანაპიროებზე დღემდე სპეციალური კონტროლი აქვთ დაწესებული ასევე საგანგებო სიტუაციების მართვის სააგანეტოს თანამშრომლებს“,-აღნიშნა მურღულიამ.
მედიაში გავრცელებული ინფორმაციით, თურქეთში, სადაც მდინარე მტკვარი სათავეს იღებს, ახლადაშენებული ჰესი უხვი ნალექის გამო წყალს ვერ იტევს და თურქული მხარე იძულებული გახდა ფარები გაეხსნა, რაც სავარაუდოდ მტკვრის ადიდებას გამოიწვევს.