აშშ-ის სახელმწიფო დეპარტამენტის ანგარიშში ქართულ მედიასივრცეში მიმდინარე მოვლენებზეც არის საუბარი. დუკუმენტში ასახულია „რუსთავი 2“-ის საქმე და „იმედსა“ და საზოგადოებრივ მაუწყებელზე თოქშოუების დახურვის საკითხები.
„რუსთავი 2“-ის ინფორმაციით, საქართველოსთან დაკავშირებით იმ ნაწილში, სადაც სიტყვის და პრესის თავისუფლებაზეა საუბარი, განსაკუთრებული ყურადღება „რუსთავი 2“-ის გარშემო განვითარებულ მოვლენებს ეთმობა. ასევე, აღნიშნულია, რომ ტელეკომპანია „იმედში“ და საზოგადოებრივ მაუწყებელზე თოქშოუების დახურვამ გააჩინა კითხვის ნიშნები პოლიტიკურ ჩარევასთან დაკავშირებით. 2015 წლის ანგარიშში მოყვანილია ჟურნალისტ ინგა გრიგოლიას განცხადება პოლიტიკური მოტივების შესახებ. „რუსთავი 2“-ის შესახებ ანგარიშში აღნიშნულია წუხილი ქვეყნის ყველაზე ფართოდ ყურებად ტელევიზიაში მთავრობის ჩარევის და სასამართლოს დამოუკიდებლობის შესახებ. ასევე, ნათქვამია, რომ ქვედა ინსტანციის სასამართლოს ქმედებები განიხილებოდა, როგორც „რუსთავი 2“-ის სარედაქციო პოლიტიკის შეცვლის მცდელობა. „რუსთავი 2“ ავრცელებს ამონარიდის თარგმანს ანგარიშიდან.
„არსებობდა შეშფოთება ქვეყნის ყველაზე ფართოდ ყურებადი ტელევიზიის რუსთავი ორის საქმეებში მთავრობის ჩარევაზე და სასამართლოს დამოუკიდებლობასთან დაკავშირებით. რუსთავი 2 ადანაშაულებდა მთავრობას, რომ ის იყო ჩართული თბილისის საქალაქო სასამართლოს მიერ 5 აგვისტოს მიღებულ გადაწყვეტილებაში კომპანიის აქტივებისა და წილების გაყინვასთან დაკავშირებით ერთ-ერთი ყოფილი მფლობელის მიერ შეტანილი სარჩელის საფუძველზე. 10 აგვისტოს, წამყვანი არასამთავრობო ორგანიზაციების ჯგუფმა განაცხადა, რომ სასამართლო განჩინება რუსთავი 2-ის საქმეზე ვერ აკმაყოფილებდა გონივრული ეჭვის სტანდარტს და გამოიწვია ტელეარხის უფლებების დისპროპორციული შეზღუდვა. არასამთავრობოებმა ასევე აღნიშნეს, რომ "გარეგნულად კერძო სამართლებრივი დავა " პოლიტიკურ გავლენაზე კითხვებს ბადებს. 10 აგვისტოს კიდევ ერთ განცხადებაში საქართველოს ახალგაზრდა იურისტთა ასოციაციამ ეჭვი შეიტანა რუსთავი ორის წინააღმდეგ მიღებული სასამართლო განჩინების დასაბუთებასა და თანაზომიერებაში, აღნიშნეს რა, რომ სასამართლომ ვერ გაითვალისწინა შეუქცევადი ზიანის რისკი საზოგადოების ინტერესზე, რომელიც ტელეარხის ფართო ყურებადობიდან გამომდინარეობდა.
3 ნოემბერს, სასამართლომ რუსთავი ორის ყოფილი ყოფილი მფლობელის სასარგებლოდ მიიღო გადაწყვეტილება და ,ას კომპანიის 100 პროცენტიანი წილი გადასცა. სასამართლომ აქედან გამომდინარე მიიღო დადგენილება დროებითი მმართველების დანიშვნისა და რუსთავი 2-ის გენერალური დირექტორისა და ფინანსური ხელმძღვანელის შეცვლის შესახებ. ამ დადგენილების მიღებით მოსამართლემ ეჭვი შეიტანა რუსთავი 2-ის სარედაქციო პოლიტიკაში და უზრუნველყო ახალი მმართველები, რომლებიც წინა მფლობელის სარჩელში ფიგურირებდნენ, უფლებამოსილებით შეეცვალათ ტელეარხის ჟურნალისტები და დაეწყოთ სამართლებრივი ქმედებები. 30 ნოემბერს სააპელაციო სასამართლომ შეცვალა დადგენილება და ნება დართო დირექტორსა და ფინანსურ ხელმძღვანელს პოსტები შეენარჩუნებინათ. მიუხედავად იმისა, რომ მთავრობა რუსთავი 2-ის საქმეს ორ კერძო მფლობელს შორის თავად ამტკიცებდა, სასამართლოს ქვედა ინსტანციის ქმედება ფართოდ განიხილებოდა რუსთავი 2-ის სარედაქციო პოლიტიკის შეცვლის მცდელობად“, - აღნიშნულია ანგარიშში.
აშშ-ის სახელმწიფო დეპარტამენტის 2015 წლის ანგარიში მსოფლიოში ადამიანის უფლებათა შესახებ, რომელიც 199 ქვეყანას მოიცავს, შეერთებული შტატების სახელმწიფო მდივანმა წარადგინა.
ანგარიშში განხილულია საქართველოს საკითხიც.