სასჯელაღსრულებისა და პრობაციის მინისტრის კახა კახიშვილის განცხადებით, საზოგადოებაში არსებობს კითხვები შიდა გამოძიების მექანიზმებზე, მაგრამ პრობლემები არა კიდევ ერთი „დიდი მონსტრის“ შექმნით, არამედ, არსებულ მოდელში დამოუკიდებლობის გაძლიერებით უნდა აღმოიფხვრას.
როგორც კახიშვილმა „ჰოლიდეი ინში“ მიმდინარე შეხვედრისას ჟურნალისტებს განუცხადა, გასაძლიერებელია მექანიზმები იმისათვის, რომ უწყებებში საქმის გამოძიების ჩაკეტილობა აღმოიფხვრას, როდესაც საქმე საკუთარ თანამშრომელს ეხება.
„არასამთავრობო სექტორს აქვს განსხვავებული პოზიცია. მათ სურთ, რომ შეიქმნას დამოუკიდებელი საგამოძიებო კომისია საკუთარი პარალელური საპროკურორო ზედამხედველობით. მათ, ფაქტობრივად, სურთ შექმნან კიდევ დამოუკიდებელი რაღაც რგოლი, რომელიც ყოველგვარი ანგარიშვალდებულების გარეშე დაიწყებს საქმეების გამოძიებას, ანუ თვითონ მიიღებს ოპერატიულ ინფორმაციას, თავად დაიწყებს საქმის გამოძიებას და თავადვე გაუწევს საპროკურორო ზედამხედველობას. როდესაც არსებობს პროკურატურა, მაშინ, როცა ყველა უწყებაში არსებობს საგამოძიებო დეპარტამენტი, ჩემი აზრით, ეს არასწორია. ნამდვილად არის კითხვები. გასაძლიერებელია მექანიზმები იმისათვის, რომ აღმოვფხვრათ უწყებებში საქმის გამოძიების ჩაკეტილობა, როდესაც საქმე ეხება საკუთარ თანამშრომელს. ამ შემთხვევაში, რაღაც ცალკე საგამოძიებო მექანიზმებისა და მონსტრების შექმნით კი არ უნდა ვიყოთ დაკავებულები, არამედ იმით, რომ არსებულ მოდელში გამოვნახოთ მექანიზმები და გავაძლიეროთ, თუნდაც, საპროცესო კანონმდებლობაში ნორმები, რომლებიც მისცემს საშუალებას, თუნდაც საკუთარ უწყებაში ჩადენილი დანაშაული გამოიძიოს მხოლოდ პროკურატურამ უწყების დამოუკიდებლად“, - განაცხადა კახიშვილმა.
მისივე თქმით, ეს არის სერიოზული საკითხი და ის ფიქრობს, რომ ამ მოდელის შემუშავებისთვის საჭიროა მეცნიერების ჩართვაც.
„ნამდვილად არის კითხვის ნიშნები საზოგადოებაში შიდა გამოძიების მექანიზმებზე, მაგრამ ეს კითხვის ნიშნები უნდა აღმოვფხვრათ არა კიდევ ერთი „დიდი მონსტრის“ შექმნით, არამედ არსებულ მოდელში დამოუკიდებლობის გაძლიერებით“, - განაცხადა კახი კახიშვილმა.
სასტუმრო „ჰოლიდეი ინში“ ფონდ „ღია საზოგადოება - საქართველოს“ ორგანიზებით, საქართველოში დამოუკიდებელი საგამოძიებო ორგანოს შექმნის საკითხზე მსჯელობენ. კონფერენციას მთავრობის, პარლამენტის, ადგილობრივი და საერთაშირისო არასამთავრობო ორგანიზაციების წარმომადგენლები და დამოუკიდებელი ექსპერტები ესწრებიან.
