საგარეჯოში, ქრისტიან დემოკრატიული პარტიის ადგილობრივ ორგანიზაციას ადგილობრივი თვითმმართველობის არჩევნებში მონაწილეობაზე გადაწყვეტილება ჯერ არ მიუღია.
როგორც ადგილობრივი ორგანიზაციის თავმჯდომარემ, მიხეილ ქვლივიძემ, რადიო "ჰერეთს" განუცხადა, გადაწყვეტილებას ცენტრალურ ოფისთან კონსულტაციის შემდეგ მიიღებენ, თუმცა ეს მას შემდეგ მოხდება, როდესაც არჩევნების ოფიციალური თარიღი გამოცხადდება.
კახეთში ოპოზიციური პარტიებიდან არჩევნებში მონაწილეობას ამ დროისთვის მხოლოდ ნოღაიდელის პარტია "სამართლიანი საქართველოსათვის" აპირებს.
რადიო „ჰერეთთან" საუბარში „სამართლიანი საქართველოსთვის" თელავის რაიონული ორგანიზაციის თავმჯდომარე მაია გოცირიძე საარჩევნო გარემოს გაუმჯობესების აუცილებლობაზე საუბრობს და ამბობს, რომ საკანონდებლო ბაზის შეცვლის შემდეგ არჩევნებში მონაწილეობა პარტიისთვის მისაღები იქნება.
ადგილობრივ არჩევნებში მონაწილეობაზე უარს ამბობს „ეროვნული ფორუმი". პარტიის თელავის რაიონული ორგანიზაციის თავმჯდომარეს ნოდარ ჯანდიერს მიაჩნია, რომ არჩევნები ოპოზიციისთვის, ხელისუფლების მხრიდან მორიგი სატყუარაა და მასში მონაწილეობა დიდი შეცდომა იქნება.