17 ნოემბერს, საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ, ამინდის გაუმჯობესებისთანავე, ჩატარებული ინტენსიური გაწმენდითი სამუშაობის შედეგად, გუდაური–კობის მონაკვეთზე, დღის მეორე ნახევარში საავტომობილო მოძრაობის აღდგენა მოხერხდა.
შეგახსენებთ, რომ 16 ნოემბერის 00.03 სთ–დან ინტენსიური თოვის, ძლიერი ქარბუქისა და ნულოვანი ხილვადობის გამო, გუდაური–კობის მონაკვეთზე ყველა სახის ავტოტრანსპორტის მოძრაობა აკრძალული იყო.
მცხეთა–სტეფანწმინდა–ლარსის საავტომობილო გზაზე ამ დროისათვის დაწესებულია შემდეგი სახის მოძრაობის რეჟიმი: ლიპყინულის გამო მცხეთა–სტეფანწმინდა–ლარსის საავტომობილო გზის კმ80-კმ136 (მლეთა-დარიალის ხეობა) მონაკვეთზე მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ავტოტრანსპორტის მოძრაობა თავისუფალია.
ამავე გზის კმ134-კმ135 (დარიალის ხეობა) მონაკვეთზე ავტოტრანსპორტის მიმოსვლისას იკრძალება მათი გაჩერება.
აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით. გზის დანარჩენ მონაკვეთზე ავტოტრანსპორტის მოძრაობა თავისუფალია.
