საქართველოს მთავრობისა და ქალაქ თბილისის მერიის გადაწყვეტილებით, პარიზში მომხდარი ტრაგედიის შედეგად დაღუპულთა ხსოვნის პატივსაცემად და ფრანგი ხალხის მიმართ სოლიდარობის ნიშნად, თბილისის საკრებულოს შენობა საფრანგეთის დროშის ფერებში განათდა.
საქართველოს პარლამენტის შენობასთან საფრანგეთის სოლიდარობის აქცია გაიმართა.
მოქალაქეებმა, რომლებმაც აქცია სოციალური ქსელი "ფეისბუკის" საშუალებით დაგეგმეს, ყვავილებითა და სანთლებით სოლიდარობა გამოხატეს საფრანგეთის მიმართ. მათ დაგმეს პარიზში მომხდარი ტერორისტული აქტები.
საფრანგეთის ელჩმა საქართველოში რენო სალენმა საქართველოს მოქალაქეებს სოლიდარობისა და თანადგომისთვის მადლობა გადაუხადა.
ელჩის თქმით, პარიზის ტერაქტები, ეს არის ევროპაში განხორციელებული მასშტაბური თავდასხმა ბოლო წლების განმავლობაში.
"ეს არ არის თავდასხმა მხოლოდ საფრანგეთზე, ეს არის თავდასხმა თავისუფლებასა და დემოკრატიაზე. ქართველებს ეს ძალიან კარგად ესმით და მადლობა ამ სოლიდარობისთვის, თქვენი თანადგომისთვის. ეს ჩვენთვის ძალიან მნიშვნელოვანია, რადგან ვგრძნობთ, რამდენად ძლიერი მეგობრები გვყავს", - განაცხადა რენო სალენსმა.
შეგახსნებთ, რომ "ისლამური რესპუბლიკის" მიერ პარიზში მომხდარ ტერორისტულ აქტებს 150-მდე ადამიანი ემსხვერპლა.
საფრანგეთში სამდღიანი გლოვაა გამოცხადებული.
