პარლამენტის ადამიანის უფლებათა დაცვის კომიტეტის თავმჯდომარის მოადგილე გედევან ფოფხაძე ადვოკატ, გიორგი მდინარაძეს ხვდება. შეხვედრა პარლამენტში, კომიტეტის სამუშაო კაბინეტში, დახურულ კარს მიღმა მიმდინარეობს.
კომიტეტის თავმჯდომარემ, ეკა ბესელიამ განაცხადა, რომ კომიტეტი ადვოკატის ცემის ფაქტს გმობს, ფაქტზე რეაგირებას ითხოვს და საკითხის მსვლელობაზე მონიტორინგს განახორციელებს.
შეგახსენებთ, საქართველოს პროკურატურის მიერ ჩატარებული საგამოძიებო მოქმედებების შედეგად ადვოკატ გიორგი მდინარაძის მიმართ განხორციელებული ძალადობის ფაქტზე მიმდინარე გამოძიების ფარგლებში, სასამართლოს მიერ გაცემული განჩინების საფუძველზე, ბრალდებულის სახით დაკავებულია შს სამინისტროს ვაკე-საბურთალოს სამმართველოს მე-5 განყოფილების უფროსი ლაშა კვირკვაია, საქართველოს სსკ-ის 333-ე მუხლის მე-3 ნაწილის „ბ“ ქვეპუნქტით, რაც გულისხმობს სამსახურებრივი უფლებამოსილების გადამეტებას, ჩადენილს ძალადობით.
