ორმაგი მოქალაქეობის მქონე დევნილების საცხოვრებელი ფართით დაკმაყოფილებაზე, შეზღუდვა მოიხსნა. კერძოდ, „იძულებით გადაადგილებულ პირთა - დევნილთა მიმართ 2015-2016 წლებში სახელმწიფო სტრატეგიის განხორციელების სამოქმედო გეგმის დამტკიცების შესახებ“ საქართველოს მთავრობის 2015 წლის 4 თებერვლის N127 განკარგულებაში ცვლილების შეტანის შესახებ“ საქართველოს მთავრობის 2015 წლის 27 აგვისტოს N1823 განკარგულებით, მოიხსნა შეზღუდვა, რომლის თანახმადაც, დევნილთა გრძელვადიანი განსახლების პროგრამის ფარგლებში, ბოლო ეტაპზე განიხილებოდა იმ დევნილი ოჯახების საცხოვრებელი ფართებით დაკმაყოფილების საკითხი, რომელთა ოჯახის წევრ(ებ)ი არიან უცხო ქვეყნის მოქალაქეები, რომელთაც კანონმდებლობით დადგენილი წესით მინიჭებული აქვთ საქართველოს მოქალაქეობა.
აქედან გამომდინარე კი, სახცოვრებელი ფართით დასაკმაყოფილებელი 10 010 დევნილი ოჯახის არსებულ სიაში, სადაც პირველადი ქულები აქვთ მინიჭებული, გარკვეული კორექტივები შევიდა.
დევნილთა სამინისტროს ინფორმაციით, თბილისში, ოქტომბრის თვეში 499 დევნილი ოჯახი მიიღებს ბინას, აქედან 298 „თბილისის ზღვის დასახლებაში“, 201 ოჯახი კი თბილისის სხვადასხვა რაიონში ქართველი მენაშენეებისგან გამოსყიდულ ახალაშნებულ კორპუსებში.
,,ახალაშენებულ კორპუსებში საცხოვრებელი ფართის მიღების მოთხოვნით 13 000-მდე განაცხადი შემოვიდა, აქედან დევნილი ოჯახების ნაწილმა სააპლიკაციო ფორმა რამდენჯერმე შეავსო, ხოლო ოჯახების ნაწილი გაერთიანდა, რის შემდეგაც განაცხადების საერთო რაოდენობამ 10 010 შეადგინა.
სამინისტრომ ჰუალინგ ჯგუფისგან სულ 598 ბინა შეიძინა, ამ ეტაპზე საცხოვრებელ ფართს 298 დევნილი ოჯახი მიიღებს, ხოლო დარჩენილი ბინები 2016 წლის თებერვალსა და ივნისში ორ ეტაპად განაწილდება. 298 ბინიდან, 16-ერთოთახიანია, 116-ოროთახიანი, 82-სამოთახიანი და 84-ოთხოთახიანი”, - აცხადებენ სოზარ სუბარის უწყებაში.
საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს დევნილთა საკითხების დეპარტამენტმა, დევნილი ოჯახების მიერ წარმოდგენილი დოკუმენტაციის საფუძველზე, გრძელვადიანი განსახლების კრიტერიუმების შესაბამისად, თითოეულ აპლიკანტს წინასწარი ქულა მიანიჭა. რომლის ნახვაც, თითოეულ დაინტერესებულ პირს, სამინისტროს ვებ-გვერდზე შეუძლია.
