13 ივნისის ტრაგედიის შემდეგ, თბილისის ზოოპარკის ხელახლა გახსნის დღეს, ისრაელის ელჩმა საქართველოში, იუვალ ფუქსმა ზოოპარკის დირექტორს, ზურაბ გურიელიძეს იერუსალიმიდან გამოგზავნილი მედიკამენტები გადასცა.
ისრაელის საელჩოს ცნობით, ტრაგედიის შემდეგ, ისრაელის საელჩოს ინივიატივით, იერუსალიმის ზოოპარკის მთავარი ვეტერინარი თბილისს დაუყოვნებლივ ესტუმრა.
ამჟამად ზოოპარკებს შორის სამომავლო თანამშრომლობის შესახებ მოლაპარაკებები მიმდინარეობს.
დღეს თბილისის ზოოპარკმა მუშაობა განაახლა. ზოოპარკის გახსნას თბილისის მერი დავით ნარმანია შვილთან ერთად დაესწრო.
სარეაბილიტაციო სამუშაოების შედეგად მოწესრიგდა ზოოპარკის ზედა ნაწილი. დავით ნარმანიას განცხადებით, სტიქიის შედეგად განადგურებულია ზოოპარკის ქვედა ტერიტორია, რომელიც აღდგენას არ ექვემდებარება.
რაც შეეხება თბილისის ზოოპარკის გადატანის პროექტს, თბილისის მერის თქმით, თბილისის ზღვის მიმდებარედ, დენდროლოგიური პარკის ტერიტორიაზე ზოოპარკის გადატანის პროექტი უკვე დამტკიცებულია, თუმცა იმ პერიოდში, რაც ახალი ზოოპარკის აშენებისთვის იქნება საჭირო, ზოოპარკი ფუნქციონირებას ძველ მისამართზე გააგრძელებს.