ნატო-ს გენერალური მდივნი იენს სტოლტენბერგი საქართველოდან გაფრენამდე ანდერს ბრეივიკის მიერ მოკლული თამთა ლიპარტელიანის მშობლებს შეხვდა.
ლიპარტელიანები ქუთაისიდან დღეს საგანგებოდ ჩამოიყვანეს. შეხვედრა რომელიც ნატოს გენერალურ მდივანსა და თამთა ლიპარტელიანის მშობლებს შორის შედგა, იენს სტოლტენბერგის ინიციატივით გაიმართა.
"მე მრავალი ინფორმაცია წამიკითხავს პრესით თქვენი ქალიშვილის შესახებ. ჩვენ ნორვეგიაში გავხსენით ადგილი, სადაც პატივს მივაგებთ გარდაცვლილთა ხსოვნას და ვიხსენებთ მათ, მათ შორის თქვენს ქალიშვილს. გმადლობთ, რომ გამონახეთ დრო შეხვედრისთვის, რათა ჩემი სამძიმარი პირადად გადმომეცა,"- აღნიშნა იენს სტოლტენბერგმა.
მანვე მადლობა გადაუხადა პრემიერ-მინისტრ ირაკლი ღარიბაშვილს შეხვედრის ორგანიზებისთვის.
"პრემიერ-მინისტრთან შეხვედრის დროს გამოვთქვი თქვენთან შეხვედრის სურვილი და პრემიერმა სწრაფად მოახდინა ამის ორგანიზება, რისთვისაც მას მადლობას ვუხდი,"- განაცხადა ნატო-ს გენერალურმა მდივანმა.
კუნძულ ოტოიაზე მომხდარი ტრაგედიისას სტოლტენბერგი ნორვეგიის პრემიერ-მინიტრი იყო.
2011 წლის 22 ივლისს ნორვეგიის დედაქალაქ ოსლოში და კუნძულ უტოიაზე, ტერორისტის მიერ ჩადენილი დანაშაულებრივი ქმედებების გამო, 77 ადამიანი დაიღუპა და 240 დაშავდა. დაღუპულთა შორის საქართველოს მოქალაქე, 23 წლის თამთა ლიპარტელიანიც იყო.
