თავდაცვის სამინისტროს ინფორმაციით, პრესაში გავრცელებული ინფორმაცია, რუსული ვერტმფრენების მიერ, საქართველოს საჰაერო სივრცის დარღვევის შესახებ, სინამდვილეს არ შეესაბამება. უწყების განმარტებით, შიდა ქართლის რეგიონის ტერიტორიაზე დაფიქსირებული ვერტმფრენები თურქეთის შეიარაღებულ ძალებს ეკუთვნის, რომლებიც საქართველოს ნებართვით მიფრინავდნენ აზერბაიჯანის მიმართულებით.
დაახლოებით, 13:40 საათზე, ორი საბრძოლო ვეტმფრენი საქართველოს კონტოლირებად სივრცეში შემოფრინდა. ,,ჯი-ეიჩ-ენის” ინფორმაციით, ვერტმფრენები შემოფრინდნენ კონფლიქტის ზონიდან. კერძოდ, კარალაეთის მიმდებარე ტერიტორიიდან, ავტობანთან დატრიალდნენ უკან და მეჯვრისხევის მიმართულებიდან დატოვეს საქართველოს ტერიტორია.
მოგვიანებით, საქართველოს სახელმწიფო უსაფრთხოების სამსახურმა რუსული ვერტმფრენების საქართველოს კონტროლირებად ტერიტორიაზე შემოფრენის ფაქტი არ დაადასტურა. "ჩვენ არ ვადასტურებთ რუსული ვერტმფრენების მიერ საქართველოს ხელისუფლების კონტროლირებად ტერიტორიაზე შემოფრენის ფაქტს", - აღნიშნეს უწყებაში.
ამავე დროს, გენერალური შტაბის უფროსი ვახტანგე კაპანაძე რუსეთის მიერ საქართველოს საჰაერო სივრცის დარღვევის შესახებ გავრცელებულ ინფორმაციაზე კომენტარს აკეთებს და აცხადებს, რომ სამწუხაროდ, ეს არ არის პირველი ფაქტი და შეიძლება არც ბოლო იყოს. თუმცა კაპანაძის თქმით, საქართველოს აქვს თავისი გზა და თავისი გეგმები. მათ შორის ნატოსთან მიმართებაში, რომელსაც აუცილებლად გააგრძელებს.
რაც შეეხება თავდაცვის უწყებას, მინისტრმა თინათინ ხიდაშელმა ჟურნალისტებთან საკითხის კომენტირებისას განაცხადა, რომ ინფორმაციას შსს-ში გადაამოწმებდა. ამჯერად, თურქული სამხედრო ვეტმფრენების შესახებ ინფორმაციას თავდაცვის უწყება "ფეისბუქის" ოფიციალურ გვერდზე ავრცელებს.
