საქართველოს პრეზიდენტი გიორგი მარგველაშვილი ნატო-ს გენერალურ მდივანს იენს სტოლტენბერგს ხვდება. შეხვედრა პრეზიდენტის სასახლეში გაფართოებულ ფორმატში მიმდინარეობს და მას საგარეო საქმეთა და თავდაცვის მინისტრები თამარ ბერუჩაშვილი და თინა ხიდაშელი, გენერალური შტაბის უფროსი ვახტანგ კაპანაძე, უშიშროების საბჭოს მდივანი ირინა იმერლიშვილი, პრეზიდენტის ადმინისტრაციის უფროსი დავით პატარაია, გარდა ამისა საგარეო ურთიერთობებისა და ეკონომიკის საკითხებში პრეზიდენტის მრჩევლები თენგიზ ფხალაძე და გიორგი აბაშიშვილი ესწრებიან.
შეხვედრის დაწყებამდე საგარეო ურთიერთობის საკითხებში პრეზიდენტის მრჩეველმა თენგიზ ფხალაძემ ჟურნალისტებთან განაცხადა, რომ ყველაზე მთავარი არის ნატოსთან თანამშრომლობის შინაარსი და არა გარეგნული ფორმა.
კითხვას - რამდენად არის შესაძლებელი , რომ საქართველო ალიანსში მაპის მიღების გარეშეც გაწევრიანდეს, ფხალაძემ განახცადა, რომ თუ ჩვენ მივაღწევთ შინაარსობრივად ჩართულობას, გარეგნული ფორმა მოინახება.
,,მთავარი არის ჩვენი თანამშრომლობის შინაარსი და არა გარეგნული ფორმა. უელსის სამიტზე გაჟღერდა გზავნილი, რომ მეტი ნატო უნდა იყოს საქართველოში, საქართველო კი უფრო მეტად ნატოში, რაც ნიშნავს აქცენტის გადატანას შინაარსსა და ჩართულობაზე. შესაბამისად, თუ ჩვენ მივაღწევთ შინაარსობრივად ჩართულობას, გარეგნული ფორმა დამერწმუნეთ, რომ მოინახება", - აღნიშნა ფხალაძემ.
