ნატო-საქართველოს საწვრთნელი ცენტრის გახსნაზე რუსეთის რეაქცია იქნება ერთმნიშვნელოვნად ნეგატიური. ამის შესახებ ფრაქცია ” ქართული ოცნების” თავმჯდომარე, ევროპასთან ინტეგრაციის კომიტეტის წევრი გიორგი ვოლსკი ”ჯი-ეიჩ-ენ”-თან საუბრისას განაცხადა.
”რასაკვირველია ეს ფაქტი რუსეთისგან არ იქნება დიდი სიხარულით მიღებული. უფრო მეტიც - იმ დაპირისპირების ფონზე, რომელიც მსოფლიოს მასშტაბით მიმდინარეობს, რეაქცია, განცხადება, პოზიცია ამასთან დაკავშირებით იქნება რასაკვირველია ნეგატიური. გარდა ამისა საქართველოს აქვს ჩამოყალიბებული საგარეო კურსი, რომელიც ასევე რუსეთის ინტერესებს რასაკვრიველია არ შეესაბამება. მეორე მხრივ არის რუსეთის სტრატეგიული ინტერესი სამხრეთ კავკასიაში, რომლის რეალიზაცია წინა ხელისუფლების უგუნურობის ხარჯზე მოახდინა რუსეთმა. კერძოდ, მან გააძლიერა თავის სამხედრო ყოფა ოკუპირებულ რეგიონებში, აფხაზეთსა და ცხინვალში. ამით გაძლიერდა იმ უბანზე, სადაც არის ალტერნატიული დერეფანი ენერგორესურსების გადაადგილებისა კასპიის რეგიონიდან ევროპის მიმართულებით და გააძლიერა ჩრდილო კავკასიის ზურგი - ეს ის თემაა, რომელზედაც ჩვენ გვაქვს გარკვეული და მნიშვნელოვანი პრეტენზია”, - აცხადებს გიორგი ვოლსკი.
შეგახსენებთ, ნატო-საქართველოს ერთობლივი წვრთნისა და შეფასების ცენტრის შექმნა ნატო-ს უელსის სამიტზე გადაწყდა. 27 აგვისტოს, ცენტრის ინაუგურაციას კრწანისის სასწავლო ცენტრის ტერიტორიაზე, ნატოს გენერალური მდივანი იენს სტოლტენბერგი დაესწრება.
