გაეროს გენერალური მდივანი ჟენევის დისკუსიის მონაწილეებს გააქტიურებისა და მაქსიმალური ძალისხმევისკენ მოუწოდებს. „გაერო მხარს უჭერს ჟენევის ფორმატით მიმდინარე მოლაპარაკებებს და მიიჩნევს, რომ ეს ერთადერთი ფორმატია, რომლითაც კონფლიქტის შედეგად წარმოქმნილი პრობლემების გადაჭრაა შესაძლებელი. მოვუწოდებთ დისკუსიის მონაწილე მხარეებს, მაქსიმალური ძალისხმევა გამოჩინონ, რათა მოლაპარაკებებში პროგრესი იქნას მიღწეული,“-ნათქვამია ბან კი მუნის განცხადებაში. ჟენევის ფორმატით მოლაპარაკებები 2008 წლის აგვისტოს ომის შემდეგ დაიწყო. მასში საქართველო, რუსეთი, აშშ, ევროკავშირი, ეუთო და გაერო, ასევე სამხრეთ ოსეთისა და აფხაზეთის არაღიარებული რესპუბლიკებია ჩართული.
