სახელმწიფო უსაფრთხოების სააგენტოს უფროსის ვახტანგ გომელაურის უწყება ყოფილი უშიშროების სამინისტროს შენობაში, ჩიტაძის ქუჩაზე განთავსდება.
ახალი უწყების ხელმძვანელმა ჟურნალისტებთან ასევე განაცხადა, რომ მისი ერთ-ერთი მოადგილე იოსებ გოგაშვილი იქნება, ხოლო დანარჩენი მოადგილეების ვინაობაზე, ჯერ გადაწყვეტილება მიღებული არ აქვს.
„მე, ალბათ, ჩიტაძის ქუჩაზე ვიქნები, სადაც ძველი უშიშროების სამინისტროს შენობა იყო. მოადგილეების შესახებ ინფორმაციას უწყების დაკომპლექტების შემდეგ გაცნობებთ, თუმცა ერთი, შემიძლია თამამად ვთქვა, რომ არის იოსებ გოგაშვილი. დანარჩენზე ჩამოვყალიბდებით, ჯერ არ ვიცით“, - განაცხადა ვახტანგ გომელაურმა.
სასჯელაღსრულებისა და პრობაციის ყოფილი მინისტრი გიორგი მღებრიშვილი პრემიერმა შინაგან საქმეთა მინისტრის პოსტზე ორი დღის წინ წარადგინა. ეს პოსტი ვაკანტური მას შემდეგ გახდა, რაც უწყების ხელმძღვანელი ვახტანგ გომელაური ახლადშექმნილ სახელმწიფო უსაფრთხოების სააგენტოს ჩაუდგა სათავეში.
კანონმდებლობის თანახმად, შეცვლილი მინისტრების მოადგილეები თანამდებობებს ტოვებენ.
