"გაერთიანებული დემოკრატიული მოძრაობის" ლიდერის ნინო ბურჯანაძის თქმით, „მთელს მსოფლიოში თავი მოგვეჭრებოდა, ბულგარეთის პრეზიდენტი რომ დაეგლიჯა იმ ვეფხვს“. ასე გამოეხმაურა პოლიტიკოსი "არჩევანის" ეთერში მთავრობის მოქმედებებს კრიზისულ ვითარებაში.
„იმ ადგილიდან, სადაც ვეფხვმა ახალგაზრდა მამაკაცი დაგლიჯა, 50 თუ 100 მეტრში ერთი საათით ადრე ბულგარეთის პრეზიდენტი ჰყავდათ მიყვანილი. საერთოდ მთელს მსოფლიოში თავი მოგვეჭრებოდა, ბულგარეთის პრეზიდენტი რომ დაეგლიჯა იმ ვეფხვს“, – განაცხადა ბურჯანაძემ.
ამასთანავე პოლიტიკოსმა აღნიშნა, რომ მსხვერპლის მინიმალიზაციის მოხდენა იყო შესაძლებელი.
„ყველასთვის ძალიან დიდი დარტყმა იყო, როდესაც ადამიანები დაიღუპნენ ისეთ ვითარებაში, როდესაც შეიძლებოდა მათი, ყველას თუ არა, უმეტესობის დაღუპვის თავიდან აცილება, იმიტომ რომ დღევანდელ მსოფლიოში მეგაპოლისებში ერთი, თუნდაც ძლიერი, წვიმის გამო ადამიანები არ იღუპებიან“, – აღნიშნა ბურჯანაძემ.
გარდა ამისა, ოპოზიციონერმა განაცხადა, რომ სტიქიური უბედურების დროს „ვერცერთმა სახელმწიფო სტრუქტურამ ნორმალურად ვერ იმუშავა“ და ამ ფაქტზე გამოძიება უნდა დაიწყოს.
„გამოძიება, რა თქმა უნდა, უნდა ჩატარდეს. ადამიანებიც რომ არ დაღუპულიყვნენ, ნორმალურ სახელმწიფოში ასეთი კრიზისების შემდეგ ყოველთვის ტარდება ვითარების შესწავლა იმისათვის, რომ ინახოს რამდენად იმუშავა შესაბამისმა სტრუქტურებმა, რამდენად ეფექტურად იყო სახელმწიფო მანქანა ამოქმედებული, იმისათვის რომ შემდგომი მოვლენების დროს კიდევ უკეთესად იყოს სახელმწიფო მომზადებული, მით უფრო როდესაც არის მსხვერპლი“, – აღნიშნა ბურჯანაძემ.
