23-25 ივნისს ქ. ვენაში გაიმართება უსაფრთხოების საკითხების გადახედვის ეუთო-ს ყოველწლიური კონფერენცია (ASRC), რომელშიც მონაწილეობას მიიღებს საქართველოს დელეგაცია საგარეო საქმეთა მინისტრის პირველი მოადგილის - დავით დონდუას ხელმძღვანელობით.
აღნიშნული კონფერენცია ყოველწლიურად იმართება და მასზე განხილავენ უსაფრთხოების კუთხით არსებულ საფრთხეებს და გამოწვევებს ეუთო-ს სივრცეში, ასევე ორგანიზაციის როლს მათი დაძლევის პროცესში.
საგარეო უწყების ცნობით, კონფერენციის ფარგლებში დაგეგმილია საგარეო საქმეთა მინისტრის პირველი მოადგილის სიტყვით გამოსვლები სხვადასხვა სამუშაო სესიების ფარგლებში უკრაინის, ევროპული უსაფრთხოების, ტრანსნაციონალური საფრთხეების, ეუთო-ს რეგიონის სამეზობლოს, შეიარაღებაზე კონტროლისა და სხვა მნიშვნელოვან საკითხებზე.
კონფერენციაზე დავით დონდუა მონაწილეებს მიაწვდის დეტალურ ინფორმაციას უსაფრთხოებისა და ადამიანის უფლებების კუთხით საქართველოს ოკუპირებულ ტერიტორიებზე არსებულ მძიმე ვითარებაზე, ისაუბრებს იძულებით ადგილნაცვალ პირთა და ლტოლვილთა პრობლემატიკაზე და რუსული მხარის დესტრუქციულ ქმედებებზე, რაც მნიშვნელოვნად აფერხებს რუსეთ-საქართველოს კონფლიქტის მშვიდობიანი გზით მოგვარების პროცესს.
უსაფრთხოების საკითხების გადახედვის ეუთო-ს ყოველწლიური კონფერენციის ფარგლებში დაგეგმილია ბატონი დონდუას ორმხრივი შეხვედრები პარტნიორი ქვეყნების დელეგაციებთან.
