პარლამენტის ჯანდაცვის კომიტეტმა დღეს მარიხუანას მოხმარების დეკრიმინალიზაციასთან დაკავშირებით საკანონმდებლო ინიციატივის განხილვა, ინიციატორის თხოვნით გადადო.
როგორც ჟურნალისტებს კომიტეტის აპარატში განუცხადეს, პროექტის განხილვა თავად გოგა ხაჩიძის თხოვნით უკვე მეორედ გადაიდო. ამჯერად კანონპროექტის განხილვის გადადება დეპუტატმა მომხდარი სტიქიური უბედურების გამო მოითხოვა.
შეგახსენებთ, კანონპროექტის თანახმად, კანაფის (ზეთი, ფისი, ნაყენი, მცენარე), მარიხუანის (გამომშრალი, ნედლი) მცირე ოდენობით უკანონოდ შეძენა ან შენახვა გასაღების მიზნის გარეშე, ან ნარკოტიკული საშუალების მოხმარება ექიმის დანიშნულების გარეშე, არ უნდა იწვევდეს სისხლისსამართლებრივ პასუხისმგებლობას მისი განმეორებით ჩადენის შემთხვევაშიც, რადგან აღნიშნული ქმედება სისხლისსამართლებრივად საშიში არ არის.
ამასთან, დეპუტატი კანონმდებლებს სთავაზობს, მარიხუანის მოხმარებისთვის ადმინისტრაციული ჯარიმის შემცირებას 500 ლარიდან 100 ლარამდე, ხოლო განმეორებით შემთხვევაში - 300 ლარამდე შემცირებას. გარდა ამისა, კანონპროექტის შესწორებები ითვალისწინებს 15-დღიანი ადმინისტრაციული დაკავების გაუქმებას.
