ყოფილი პრემიერ-მინისტრის ბიძინა ივანიშვილის მტკიცებით, იგი არ მართავს საქართველოს ხელისუფლებას კულისებიდან, მისი განმარტებით, მან კარგი ანალიზი იცის, მის სიტყვას კარგი ფასი აქვს და სწორედ ეს აშფოთებთ როდესაც საუბრობენ, რომ ის ხელისუფლებას კულისებიდან მართავს.
რაც შეეხება რჩევებს, ივანიშვილი აცხადებს, რომ თვეში ერთხელ რჩევა, მსოფლიოში აპრობირებული და მიღებულია.
„არაფერსაც არ ვმართავ კულისებიდან. არასდროს არ ვარღვევდი კანონს და არ ვაკეთებდი იმას, რასაც საჯაროდ არ ვაცხადებდი. ეს აქვთ მხოლოდ მხედველობაში. თამასა, რომელიც ჩემი პრემიერობის დროს დავტოვე, იმ თამასას ვინც ვერ შეინარჩუნებს, რა თქმა უნდა, მე არ გავჩერდები. ეს კარგად იციან. მე საზოგადოების წევრი ვარ და მაქვს გარკვეული ნდობა და იციან, რომ თამასის დაბლა დაშვებას არავის ვაპატიებ. ეს აშფოთებთ და მიაჩნიათ, რომ მე ვმართავ. დიახ, თუ ამ ჩრდილს ხედავენ, რომ მე ხმას ამოვიღებ დარღვევებზე, ძალიან ბევრი მთავრობის წევრი ამას ანგარიშს უწევს და უნდა გაუწიონ კიდეც. იციან, რომ მე არ გავჩერდები და არ გავჩუმდები. ეს არ არის მართვა. ჩვენ ძალიან წარმატებული პრემიერი და წარმატებული მთავრობა გვყავს და მშვენივრად ართმევენ თავს საკუთარ პრობლემებს. თვეში ერთხელ რჩევა, მთელ ევროპასა და მსოფლიოში მიღებულია“, - აღნიშნა ივანიშვილმა.
მისივე თქმით, ქვეყანას ძალიან წარმატებული პრემიერი და მთავრობა ჰყავს და ხელისუფლებაში დაბრუნების მიზეზს ვერ ხედავს.
როგორც ივანიშვილმა ჟურნალისტებთან საუბრისას აღნიშნა, ცუდი პოლიტიკური სიტუაცია უნდა დატრიალდეს, რომ პოლიტიკაში დაბრუნდეს.
„რაღაც ცუდი პოლიტიკური სიტუაცია უნდა დატრიალდეს, რომ პოლიტიკაში დავბრუნდე. თუ ხედავთ, რომ საზოგადოება ვეღარ ახერხებს კონტროლს და ხელისუფლება გავიდა თამაშიდან, რაღაც ამის მსგავსი უბედურება თუ მოხდა, ამ შემთხვევაში შეიძლება მომიწიოს პოლიტიკაში დაბრუნება. მე ვერ ვხედავ ამის ნიშნებს. საზოგადოებამ კარგად აკრიფა, მთავრობაც ცდილობს და იციან, რომ თამასა ძალიან მაღლაა აწეული“,- განაცხადა ივანიშვილმა.
