იუსტიციის მინისტრი თეა წულუკიანი თვლის, რომ პროკურატურის რეფორმის პირველი ნაბიჯი ძალიან ნოვატორულია. ამის შესახებ მან გადაცემა „20 30“ განაცხადა.
„ეს არის პირველი ნაბიჯი და ეს ნაბიჯი ძალიან ნოვატორულია – თანამედროვე პრაკტიკაზე აგებული მოდელი. არავინ წარმოიდგინოს, რომ ამ ნაბიჯით პროკურატურის რეფორმა მთავრდება, ამით ის მხოლოდ იწყება“, – განაცხადა თეა წულუკიანმა.
შეგახსენებთ, იუსტიციის სამინისტრომ შეიმუშავა ცვლილებების პაკეტი კანონში „პროკურატურის შესახებ“. ცვლილებების თანახმად, მთავარი პროკურორის კანდიდატურას მთავრობას წარუდგენს 9კაციანი პროკურორთა საბჭო, რომლის შემადგენლობაში იქნება: 4 პროკურორი, 2 პარლამენტის წევრი, 2 არასამთავრობო ორგანიზაციის წარმომადგენელი. საბჭოს თავმჯდომარეობს იუსტიციის მინისტრი. განხილვის შემდეგ მთავრობა პარლამენტს წარუდგენს კანდიდატურას.
„რეალურად ვთავაზობთ იმას, რაც წარმოუდგენელი შეიძლება იყოს ვინმეს თვალში. კერძოდ, იუსტიციის მინისტრს და პრემიერს შორის ჩაკეტილ წესს [მთავარი პროკურორის კანდიდატის წარდგენა] ჩვენ ბოლომდე ვხსნით“, – აღნიშნა თეა წულუკიანმა.
ამასთანავე უწყების ხელმძღვანელმა განმარტა, რომ ცვლილებების თანახმად, მთავარი პროკურორი პირველ რიგში პარლამენტის წინაშე იქნება ანგარიშვალდებული.
„დღეს არის ისეთი გაუგონარი რამ: პროკურორი მთავრობის და იუსტიციის მინისტრის გარეშე დარჩენილი ადამიანია და, როდესაც დეპუტატს უჩნდება კითხვა მთავარ პროკურორთან, კანონი დღეს არ უშევებს დეპუტატს მთავარ პროკურორამდე. კანონი არ ამბობს ვინ აგებს პარლამენტის წინაშე საპროკურორო საქმიანობაზე პასუხს. ჩვენ ბევრი ნაკლი გვაქვს ამ სისტემაში და ამის გამოსწორებაზე ვფიქრობთ“, – დასძინა მინისტრმა.
