იუსტიციის მინისტრის თეა წულუკიანის თქმით, დღეს პროკურორთა კორპუსი დიდი კომპეტენტურობით არ გამოირჩევა. ამის შესახებ მან გადაცემა „20 30“-ში განაცხადა. გარდა ამისა, მინისტრმა აღნიშნა, რომ პროკურორებს წინა მთავრობების დროს „სჭირდებოდათ ერთადერთი რამ: ადამიანების მოყვანა და ციხეში ჩასმა“.
„პროკურატორის ორგანოებში არაერთი პროფესიონალია, მაგრამ, ნუ ეწყინება ნურავის, დღეს პროკურორთა კორპუსი დიდი კომპეტენტურობით არ გამოირჩევა. იმიტომ კი არა, რომ მათ თეორიული ცოდნა აკლიათ, არამედ უმრავლესობა ამ ადამიანებისა არაერთი მთავრობის, და ძირითადათ წინა მთავრობის, ხელში გაიარა დიდი წნეხის ქვეშ და მათ რეალურად არ ჰქონდათ თავისუფალი სასამართლო. ისინი მიჩვეულნი იყვნენ, რომ პატარა დიქტატორებივით მივიდოდნენ სასამართლოში, დაჯდებოდნენ, არც არაფერს ასაბუთებდნენ და იცოდნენ, რომ მოსამართლე ბრმად გაიზიარებდა, რასაც პროკურორი ამბობდა. ამგვარი სიტუაცია პროკურორებს არ აძლევდა განვითარების საშუალებას, მათ მუშაობა არ სჭირდებოდათ, მათ სჭირდებოდათ ერთადერთი რამ: ადამიანების მოყვანა და ციხეში ჩასმა“ - განაცხადა მინისტრმა.
ამასთანავე თეა წულუკიანმა აღნიშნა, რომ „პროკურორთა კორპუსს სჭირდება ახალი ტიპის განათლება, ახალი ტიპის უნარჩოები და იმის განცდა, რომ ისინი ემსახურებიან საზოგადოებას და არა რომელიმე პოლიტიკურ ძალას“.
