16-17 აპრილს, სერბეთის ქალაქ ბელგრადში ეუთო-ს დემოკრატიული ინსტიტუტებისა და ადამიანის უფლებების ოფისის (OSCE/ODIHR), ეროვნულ დემოკრატიული ინსტიტუტის (NDI) და აშშ-ს განვითარების სააგენტოს (USAID) ერთობლივი ორგანიზებით, ცენტრალური და აღმოსავლეთ ევროპისა და ევრაზიის ქალ ლიდერთა ინტერ-რეგიონული ფორუმი გაიმართა.
პარალემნტის ინფორმაციით, საქართველოდან, საერთაშორისო კონფერენციას, პარლამენტის თავმჯდომარის პირველი მოადგილე, გენდერული თანასწორობის საბჭოს თავმჯდომარე, მანანა კობახიძე დაესწრო, რომელმაც ფორუმის მონაწილეებს სიტყვით მიმართა და საქართველოში გენდერული თანასწორობის უზრუნველყოფის კუთხით და ქალთა პოლიტიკაში აქტიური ჩართულობის თვალსაზრისით არსებულ მიღწევებზე მოხსენება წაიკითხა.
გენდერული თანასწორობისა და ქალთა პოლიტიკაში მონაწილეობაზე საუბრისას, მანანა კობახიძემ საქართველოში არსებული ვითარება მიმოიხილა და აღნიშნა, რომ საკანონმდებლო ხელისუფლებაში, საქართველოს მე-8 მოწვევის პარლამენტში, ქალთა რაოდენობა პარლამენტართა სრული შემადგენლობის დაახლოებით 11%-ია, ეს მაჩვენებელი კი თითქმის ორჯერ აღემატება წინა მოწვევის პარლამენტში მყოფ ქალ პარლამენტართა რაოდენობას, რომელიც მხოლოდ 6%-ს შეადგენდა. მისივე განცხადებით, ანალოგიური ვითარებაა აღმასრულებელი ხელისუფლების უმაღლეს რგოლში და დღეისათვის საქართველოს მთავრობაში 3 ქალი მინისტრი საქმიანობს, რაც მთავრობის წევრთა შემადგენლობის 15%-ს უთანაბრდება.
„განსაკუთრებულ აღნიშნვას საჭიროებს, რომ ახლახანს საქართველოს ისტორიაში პირველად უზენაესი სასამართლოს თავმჯდომარედ არჩეული იქნა ქალბატონი ნინო გვენეტაძე, რაც უპრეცენდენტო ფაქტია ქართული რეალობისთვის. ზოგადად კი სასამართლო სისტემაში მოსამართლე ქალთა რაოდენობა აჭარბებს მამაკაცებისას, მაგრამ სასამართლო პალატებსა და კოლეგიებს ძირითადად კაცები ხელმძღვანელობენ. ამ მცირე სტატისტიკიდან გამომდინარე, ცხადია რომ საქართველოში ქალთა პოლიტიკური მონაწილეობის თვალსაზრისით სიტუაცია სულ უფრო უმჯობესდება. მიუხედავად ამისა, ქართულ საზოგადოებაში დღითიდღე მწიფდება აზრი, რომ აუცილებელია გაცილებით ფართომასშტაბიანი და ეფექტური ღონისძიებების, მათ შორის, გენდერული კვოტების მექანიზმის შემოღება. ამის დემონსტრირება იყო პრეზიდენტის გადაწყვეტილებაც, რომელმაც 2015 წელი საქართველოში ქალთა წლად გამოაცხადა და ამ გადაწყვეტილებით კიდევ ერთხელ გაუსვა ხაზი საკითხის მნიშვნელობას.“, - განაცხადა გენდერული თანასწორობის საბჭოს თავმჯდომარემ.
პარლამენტის თავმჯდომარის პირველმა მოადგილემ თავის გამოსვლაში გენდერული კვოტების საკითხი საერთაშორისო ხელშეკრულებების ნაწილშიც განიხილა და აღნიშნა, რომ საქართველოს მიერ ხელმოწერილი ხელშეკრულებების შესაბამისად ქვეყანას გარკვეული ვალდებულებები აქვს აღებული. მისი განცხადებით, განსაკუთრებით აღსანიშნავია გაეროს საერთაშორისო პაქტი სამოქალაქო და პოლიტიკურ უფლებათა შესახებ (ICCPR), კონვენცია „ქალთა მიმართ ყოველგვარი დისკრიმინაციის აღმოფხვრის შესახებ“ (CEDAW) და გაეროს რეზოლუციის 1325 სამოქმედო გეგმა. ქალთა მიმართ დისკრიმინაციის აღმოფხვრა და თანასწორობის უზრუნველყოფა ევროკავშირთან ხელმოწერილი ასოცირების ხელშეკრულების (თავი 14, მუხლი 349) მნიშვნელოვან კომპონენტსაც წარმოადგენს. CEDAW კომიტეტის მიერ შემუშავებული 2014 წლის რეკომენდაცია, რომლის მიხედვითაც, პოლიტიკურ და საჯარო პროცესებში ქალთა სრულყოფილი და თანაბარი თანამონაწილეობის უზრუნველყოფაა აუცილებელი, საქართველომ შემდგომი ორი წლის ვადაში უნდა შეასრულოს.
„ყოველივე ზემოთქმულის ფონზე მე იმედი მაქვს, რომ კვოტებთან დაკავშირებით მოხდება პოზიციათა შეჯერება როგორც მმართველ კოალიციაში, ისე, მთელს საზოგადოებაში და საქართველო სრულყოფილად შეძლებს ქალთა პოლიტიკური გაძლიერების კუთხით ნაკისრი საერთაშორისო ვალდებულებების შესრულებას, განსაკუთრებით, გაეროს CEDAW კომიტეტის წინაშე. აქვე, დავამატებ, რომ შესაძლებლობათა მაქსიმუმი კეთდება საქართველოს 2014-2015 წლების ადამიანის უფლებების დაცვის სამთავრობო სამოქმედო გეგმის 14.1.6 შესასრულებად, რომლის ამოცანაა გადაწყვეტილების მიღების დონეზე ქალთა მონაწილეობის გაზრდის ხელშეწყობა.ბოლოს კი მინდა აღვნიშნო, რომ კვოტების შემოღებით ჩვენ გამოვიყენებთ ისტორიულ შანსს, საქართველო წარმოჩინდეს როგორც მოწინავე სახელმწიფო ქალთა უფლებრივი მდგომარეობის გაუმჯობესების სფეროში, რომელიც სრულად იზიარებს დასავლელი პარტნიორების და საერთაშორისო ორგანიზაციების რეკომენდაციებს ქალთა პოლიტიკური გაძლიერების კუთხით და მე ყველანაირად შევუწყობ ხელს შესაბამისი ქმედითი ნაბიჯების გადადგმას“, - განაცხადა მანანა კობახიძემ.
ინტერ-რეგიონალურ ფორუმზე, რომელსაც სერბეთის ვიცე-პრემიერი, აშშ-ს ელჩი სერბეთში და საკითხზე მომუშავე საერთაშორისო ორგანიზაციების ხელმძღვანელი პირები დაესწრნენ, პოლიტიკურ ცხოვრებაში ქალთა ჩართულობის, ქალთა უფლებების დაცვის მაღალი სტანდარტების რეგლამენტაციის და გაეროს უშიშროების საბჭოს 1325 რეზოლუციის იმპლემენტაციის მიზნით მომზადებულ ეროვნულ სამოქმედო გეგმებთან დაკავშირებული საკითხები განიხილეს.
