,,პოლონეთი, შვედეთი და დანია დარწმუნებული არიან, საქართველოს ადგილი არის ევროპაში და ისინი ყველანაირდ დაგვეხმარებიან ამ გზაზე სიარულში”, _ამის შესახებ, პარლამენტის თავმჯდომარემ დანიის სამეფოს საგარეო საქმეთა მინისტრთან, მარტინ ლიდეგორდთან, შვედეთის სამეფოს საგარეო საქმეთა მინისტრთან, მარგოთ ვოლსტრომთან და პოლონეთის რესპუბლიკის საგარეო საქმეთა მინისტრთან, გჟეგოჟ სხეტინასთან შეხვედრის შემდეგ გააკეთა.
შეხვედრაზე, საუბარი შეეხო საქართველოს ევროპულ და ევროატლანტიკურ პერსპექტივებს, ევროკავშირთან დადებულ ასოცირების ხელშეკრულებას და მაისში დაგეგმილ აღმოსავლეთ პარტნიორობის რიგის სამიტს. მხარეებმა ასოცირების შეთანხმების იმპლემენტაციისა და საქართველო-ევროკავშირს შორის სავიზო რეჟიმის ლიბერალიზაციის საკითხებზეც ისაუბრეს.
საქართველოს პარლამენტის თავმჯდომარემ მადლობა გადაუხადა სტუმრებს იმ ღვაწლისთვის, რომელიც დანიის სამეფოს, პოლონეთის რესპუბლიკას და შვედეთის სამეფოს აქვს გაწეული საქართველოსთვის, დამოუკიდებლობის დღიდან დღემდე.
დავით უსუფაშვილის განცხადებით, გადაწყვეტილება, რომ საქართველო, რაც შეიძლება მალე უნდა გახდეს დემოკრატიული ევროპის ნაწილი, ქართველმა ხალხმა მიიღო.
მისი თქმით, რიგის სამიტისგან საქართველო ელის კონკრეტულ რეზულტატს, კონკრეტულ შედეგებს.
პოლონეთის რესპუბლიკის საგარეო საქმეთა მინისტრმა აღნიშნა,რომ მნიშვნელოვანია საქართველოს რიგის სამიტზე ვიზა-ლიბერალიზაციის სამოქმედო გეგმა მიეცეს.
შვედეთის სამეფოს საგარეო საქმეთა მინისტრმა, საქართველოს ევროკავშირთან დაახლოების პროცესში სამი ძირითადი მიმართულება გამოყო. მისი თქმით ძალიან მნიშვნელოვანია მუშაობის გააქტიურება იურიდიული მიმართულებით, რათა საქართველოს კანონმდებლობა ევროკავშირის სტანდატრტებს დაუახლოვდეს; ასევე პოლიტიკური ლიდერების აქტიურობა, საერთო მიზნის გარშემო საზოგადოების კონსოლიდაციისთვის; და ბოლოს ხალხთა შორის ურთიერთობის გააქტიურება, რომელიც ხელს შეუწყობს საქართველოსა და ევროკავშირის წევრი ქვეყნების საზოგადოებებს შორის კავშირების გამყარებას.
შეხვედრის დასრულების შემდეგ პარლამენტის თავმჯდომარემ ჟურნალისტებთან განაცხადა, რომ საქართველოს მათი სახით მეგობარი ჰყავს, რომელიც ყველა შემთხვევაში, ყველა ვითარებაში, სირთულეებშიც, მზად არიან აღმოუჩინონ დახმარება.
„ კიდევ ერთხელ მივიღეთ ამ სამი ძალიან მნიშვნელოვანი სახელმწიფოს უმაღლესი წარმომადგენლების მხარდაჭერა და დაპირება იმისა, რომ საქართველოს მათი სახით მეგობარი ჰყავს ყველა შემთხვევაში, ყველა ვითარებაში, სირთულეებშიც, რომ ისინი მზად არიან აღმოუჩინონ საქართველოს ყველა იმ ტიპის დახმარება, რაც ჩვენ ძალიან გვჭირდება რიგის სამიტზე და რიგის სამიტის შემდეგაც.სამივე ეს ქვეყანა - პოლონეთი, შვედეთი, დანია დარწმუნებული არიან, რომ საქართველოს ადგილი არის ევროპაში და ისინი ყველანაარდ დაგვეხმარებიან ამ გზაზე სიარულში. ჩვენ ვისაუბრეთ იმაზეც თუ რა ტიპის გამოწვევები აქვს საქართველოს უსაფრთხების თვალსაზრისით. ვიცით, რომ სამივე ეს ქვეყანა მყისიერად და მკაფიოდ სცემდა პასუხს ყველა იმ გამოწვევას, რომელიც საქართველოს ექმნებოდა რუსეთის მხრიდან და კიდევ ერთხელ მივიღეთ ეს დაპირება. გარდა ამისა, შვეთანხმდით, რომ ჩვენს შორის ურთიერთობა ნელ-ნელა უნდა გამრავალფეროვნდეს და მან უნდა მოიცვას ეკონომიკის, განათლების, კულტურის სფეროები და ჩვენ არ უნდა დავრჩეთ მძევლები იმ პრობლემების, რომელშიც ვართ. უნდა მოვახერხოთ უსაფრთხოების საკითხების გადაწყვეტასთან ერთად მივიღოთ ის სარგებელი რაც ამ ქვეყნებთან ურთიერთობაში შეგვიძლია მივიღოთ სხვა სფეროებში.
შეხვედრას დავით უსუფაშვილთან ერთად საქართველოს პარლამენტის დეპუტატები:
მანანა კობახიძე, თედო ჯაფარიძე, ზვიად კვაჭანტირაძე, ,გიოორგი ვოლსკი, გიგლა აგულაშვილი,ლევან თარხნიშვილი და ზურაბ აბაშიძე ესწრებოდნენ.
